ޗައިނާއަށް ކުރިމަތިވެފައިވާ ކޮވިޑްގެ އާ ރާޅާ އެކު ހޮސްޕިޓަލްތައް ފުރެމުންދާކަމުގެ ކަންބޮޑުވުން އެބަަ އޮތް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯއިން ބުނީ ހޮސްޕިޓަލްތަކުގެ އައިސީޔޫތަކަށް ވަރަށް ބާރުބޮޑުވެފައިވާ ކަމަށެވެ. އެހެން ނަމަވެސް، ކޭސްތަކުގެ އަދަދު ދަށް ކަމަށް ޗައިނާއިން ބުނެ އެވެ.
ޗައިނާގެ ތަފާސްހިސާބުން ދައްކާ ގޮތުގައި ބުދަ ދުވަހު ކޮވިޑް ޖެހިގެން އެ ގައުމުން އެއްވެސް މީހަކު މަރެއް ނުވެ އެވެ. އެހެން ނަމަވެސް، އެ މައުލޫމާތުގެ ސައްހަކަމާ މެދު ބައެއް ފަރާތްތަަކުން ސުވާލު އުފައްދަ އެވެ.
ޗައިނާގައި ކޭސްތައް އިތުރު ވާން ފެށީ ކުއްލިއަކަށް ލުއިތަކެއް ދިނުމުންނެވެ. ރަސްމީ ޑޭޓާއިން ދައްކާ ގޮތުގައި ކޮވިޑް ޖެހިގެން ހޯމަ ދުވަހު ދެ މީހުން އަދި އަންގާރަ ދުވަހު ފަސް މީހުން މަރުވި އެވެ.
ތަފާސްހިސާބާ މެދު ސުވާލު އުފެދޭތީ ޑަބްލިއުއެޗްއޯގެ އެމެޖެންސީތަކާ ބެހޭ ވެރިޔާ ޑރ. މައިކަލް ރަޔަން ގޮވާލެއްވީ އެ ގައުމުގެ ހާލަތާ ގުޅޭ މައުލޫމާތު ސާފުކޮށް ހިއްސާ ކުރުމަށެވެ.
ޑަބްލިއުއެޗްއޯގެ ވެރިޔާ ޓެޑްރޯސް އަދަނޮމް ވެސް ވަނީ ޗައިނާގެ ހާލަތާ ގުޅޭ ގޮތުން ކަންބޮޑުވުން ފާޅުކުރައްވައިފަ އެވެ. އޭނާ އެދިވަޑައިގެންނެވީ ބަލީގައި ބޮޑުވަރުވާ މިންވަރާއި، އެޑްމިޓް ކުރަން ޖެހޭ ވަރާއި، އައިސީޔޫގައި ފަރުވާ ދޭން ޖެހޭ ވަރާ ގުޅޭ ފުރިހަމަ މައުލޫމާތު ފޯރުކޮށްދިނުމަށެވެ
