އިސްލާމިކް ބޭންކުގެ ހުޅުމާލެ ގޮފި ފިތުރޯނު މަގުގައި ހުންނަ ވަން އެވެނިއު އިމާރާތަށް ބަދަލުކޮށް ހިދުމަތް ދޭން ފަށައިފި އެވެ.
ފިތުރޯނު މަގުގައި އަލަށް ހުޅުވި މި ގޮތްޕާ އެކު ކުރިން އެ ބޭންކުން ސެންޓުރަލް މޯލްގައި ހިދުމަތް ދެމުން އައި ތަން ވަނީ ބަންދު ކޮށްފަ އެވެ.
އިސްލާމިކް ބޭންކުން ބުނީ އާ އިމާރާތުގައި އެ ބޭންކުގެ ގޮފި ހުޅުވާފައި ވަނީ އޭޓީއެމްގެ ހިދުމަތް ވެސް އެތަނުން ލިބޭ ގޮތަށެވެ. އަދި އެ ސެންޓަރުން 24 ގަޑިއިރު ޗެކާއި ފައިސާ ޖަމާ ކުރުމުގެ ހިދުމަތް ލިބޭނެ ކަމަށާއި މި ބަދަލާ އެކު އެ ބޭންކުގެ ހިދުމަތް ހޯދާ ފަރާތްތަކަށް މިހާރަށް ވުރެ ފަހި މާހައުލަކުން ފަސޭހަ ކަމާ އެކު ހިދުމަތް ލިބޭނެ މަގު ތަނަވަސްވެގެން ދާނެ ކަމަށެވެ.
"ރާއްޖޭގެ އިގުތިސާދީ މައި މަރުކަޒަށް ހުޅުމާލެ ވަމުންދާއިރު، އަލަށް މި ހުޅުވުނު ގޮތްޕާއެކު އޭޓީއެމްތަކާއި ޕީއޯއެސްތަކާއި އަދި އެނޫން ވެސް ޒަމާނީ ވަސީލަތްތައް މެދުވެރިކޮށް މާލެ ސަރަހައްދުގައި މި ބޭންކުން ދެމުން ގެންދާ ހިދުމަތްތައް އިތުރަށް ފުޅާވެގެންދާނެ،" އިސްލާމިކް ބޭންކުގެ މެނޭޖިން ޑިރެކްޓަރު އަދި ޗީފް އެގްޒެކެޓިވް އޮފިސަރުގެ މަގާމު ވެސް ފުރުއްވަމުން ގެންދަވާ، މުފައްޛަލް އިދުރީސް ޚުމްރީ ވިދާޅުވި އެވެ.
އެމްއެމްއޭގެ ގަވަރުނަރާއި އެޗްޑީސީގެ މެނޭޖިން ޑިރެކްޓަރު އަދި އިސްލާމިކް ބޭންކުގެ މެނޭޖިން ޑިރެކްޓަރު އެ ބޭންކުގެ އާ ގޮފި ހުޅުއްވައިދެއްވަނީ -- ފޮޓޯ: އިސްލާނިކް ބޭންކު
މި ބަދަލަކީ ހުޅުމާލެ ފޭސް ދޭއްގައި މީހުން ދިރިއުޅެން ފެށުމާ އެކު އެ އަވަށުގެ އާބާދީ ބޮޑުތަނުން އިތުރުވެފައި ވުމުގެ ސަބަބުން އެ ބޭންކުން ހުޅުމާލޭގައި ދެމުން އަންނަ ހިދުމަތް އިތުރަށް ފުޅާ ކުރުމުގެ ވިސްނުމުގައި ގެނައި ބަދަލެއް ކަމަށް އެ ބޭންކުން ބުނެ އެވެ.
އަލަށް ހުޅުވި މި ސެންޓަރުގެ އިތުރުން ހުޅުމާލޭގައި އެ ބޭންކުގެ ތިން އޭޓިމްއެއް މެދުވެރިކޮށް ކަސްޓަމަރުންނަށް ހިދުމަތްތައް ފޯރުކޮށްދެމުން ދެއެވެ.
