ޗައިނާގައި ކޮވިޑް ކޭސްތަައް ހަލުވިކަމާ އެކު އިތުރުވަމުން ދާތީ އިންޑިއާގެ ހެލްތު މިނިސްޓްރީ އެލާޓަށް ގެނެސްފި އެވެ.
އިންޑިއާގެ މައި ސަރުކާރުން ވަކިވަކި ސްޓޭޓުތަކަށް އެންގީ ކޮވިޑަށް ޕޮޒިޓިވް ހުރިހާ ކޭސްތަކެއްގައި ވެސް ޖެނޯމް ސީކުއެންސިން ހެދުމަށެވެ.
އޭގެ އިތުރުން ކްރިސްމަސް އަދި އާ އަހަރުގެ ޗުއްޓީއާ ދިމާކޮށް ބަލި ފެތުރުން ކުޑަކުރުމަަށް އެޅޭނެ ފިޔަވަޅުތައް އެޅުމަށް ވެސް ސްޓޭޓްތަކަށް އެންގި އެވެ.
ކޮވިޑް ވައިރަހުގެ ނުރައްކާތެރި ދެ ރާޅު 2020 އަދި 2021 ގައި ވެސް އިންޑިއާއަށް ކުރިމަތިވި އެވެ. އެކަމަކު މި އަހަރުގެ ކޭސްތައް މަދެވެ.
ސަރުކާރުގެ ޑޭޓާ ދައްކާ ގޮތުން މިހާރު ކޮންމެ ހަފުތާއަކު ވެސް ފެންނަނީ 1،200 ކޭސް އެވެ. މިހާތަނަށް 2.2 ބިލިއަން ކޮވިޑް ވެކްސިން ޑޯޒް ޖަހާފައިވެ އެވެ.
އިންޑިއާގައި ރައްކާތެރިކަމުގެ ފިޔަވަޅު އަޅަން ފެށި އިރު، އަވައްޓެރި ޗައިނާގައި ކޭސްތައް އިތުރު ވާން ފެށީ ކުއްލިއަކަށް ލުއިތަކެއް ދިނުމުންނެވެ.
ކޭސްތައް އިތުރުވެ، ހޮސްޕިޓަލްތަކާއި މެޑިކަލް ފެސިލިޓީތަކަށް ވަނީ ބާރުބޮޑުވެފަ އެވެ. އެހެންވެ، ޗައިނާގެ އެކި ހިސާބުތަކުގައި ވަގުތީ ފެސިލިޓީތައް ވަނީ ގާއިމްކޮށްފަ އެވެ.
އިންޑިއާ ސަރުކާރުގެ ހެލްތު ސެކެޓްރީ ރާޖޭޝް ބުޝަން ހުރިހާ ސްޓޭޓްތަކަށް ފޮނުއްވި ސިޓީއެއްގައި ވިދާޅުވީ "ޖަޕާން، އެމެރިކާ، ކޮރެއާ، ބްރެޒިލް އަދި ޗައިނާގައި ކޭސްތައް އިތުރުވަމުން ދާތީ" އާ ވޭރިއެންޓްތައް ޓްރެކް ކުރުން މުހިއްމު ކަމަށެވެ.
