ހޮނިހިރު ދުވަހު ކެނެޑާގެ ޓޮރޮންޓޯގައި އުމުރުން 59 އަހަރުގެ ފިރިހެނަކަށް ވަޅިން ހަމަލާދީ، މަރާލުމުގެ ތުހުމަތުގައި ފުރާވަރު އުމުރުގެ އަށް އަންހެން ކުދިން ހައްޔަރުކޮށްފި އެވެ.
ފުލުހުން ބުނީ ހައްޔަރު ކުރީ އުމުރުން 13 އަހަރާއި 16 އަހަރާ ދެމެދުގެ ކުދިންތަކެއް ކަމަށެވެ. އެ ކުދިން ބައްދަލުވީ އޮންލައިންކޮށް ކަމަށާއި، ބެލެވޭ ގޮތުގައި ފުރަތަމަ ފަހަރަށް އެއްތަންވެ ބައްދަލުވީ ހަމަލާ ދިން ރޭ ކަމަށް ވެސް ފުލުހުން ބުންޏެވެ.
އެ ކުދިންތައް ހައްޔަރު ކުރީ ހޮނިހިރު ދުވަހުގެ ރޭ 12:00 ޖެހި ފަހުން ހަމަލާ ދިން ސަރަހައްދާ ކައިރިންނެވެ.
މަރުވި މީހާގެ ވަނަވަރު ހާމަކޮށްފައި ނުވާ އިރު، އޭނާ ދިރިއުޅެމުން ދިޔައީ ބޯހިޔާވަހިކަން ނެތް މީހުންނަށް ހާއްސަ ސެންޓަރެއްގަ އެވެ.
"އެ ސަރަހައްދުގައި އޭނާގެ އާއިލާގެ ގާތް މީހުން އުޅޭ. އެހެންވީމާ އެއީ ހިޔާވަހިކަމެއް ނެތް މީހެކޭ ސީދާ ނުބުނެވޭނެ. ބެލެވެނީ ވަރަށް ފަހުން ދިމާވި ހާލަތެއްގެ ސަބަބުން އެ ސެންޓަރުގައި ދިރިއުޅެން ފެށި ކަމަށް،" ޓޮރޮންޓޯ ފުލުހުންގެ ޑިޓެކްޓިވް ސާޖަންޓް ޓެރީ ބްރައުން ވިދާޅުވި އެވެ.
ފުލުހުން ގަބޫލުކުރާ ގޮތުގައި އަންހެން ކުދިންތައް އެ މީހާއަށް ހަމަލާ ދިނީ އޭނާގެ އަތުގައި ރާ ފުޅިއެއް އޮތުމުން، އެ އަތުލުމުގެ ބޭނުމުގައި ކަމަށް އެކަށީގެންވެ އެވެ.
އެ މީހާގެ ގައިގައި ޒަހަމްތަައް ހުރި މަންޒަރު ފެނި މަގުމަތީގައި ތިބި ބަޔަކު ފުލުހުންނަށް ރިޕޯޓު ކުރުމުން ވަގުތުން ހޮސްޕިޓަލަށް ގެންދިޔަ އެވެ. ނަމަވެސް ޒަހަމްތަކުގެ ސީރިއަސްކަމުން މަރުވީ އެވެ. އެ ސަރަހައްދުން ހަތިޔާރުތަކެއް ހޯދި ނަމަވެސް، ފުލުހުން ތަފްސީލް ހާމައެއް ނުކުރެ އެވެ.
ހަމަލާގައި ބައިވެރިވި ކުދިންގެ ތެރެއިން ތިން ކުއްޖެއްގެ މައްސަލަތަކެއް މީގެ ކުރިން ފުލުހުންނަށް ފާހަގަވެފައިވެ އެވެ. އެހެން ނަމަވެސް، ހަމަލާ ދިން ސަބަބު ސާފެއް ނޫނެވެ.
