މި ސަރުކާރުން ވެރިކަމަށް އައި ފަހުން ރާއްޖޭގެ އެކި ކަންކޮޅުތަކުގައި 100 އަށް ވުރެ ގިނަ އިންޖީނުގެ އަލަށް ގާއިމް ކުރެވިއްޖެ ކަމަށާއި މިއީ "އަޖައިބެއް"ގެ ގޮތުގައި ނައިބު ރައީސް ފައިސަލް ނަސީމް ސިފަކުރައްވައިފި އެވެ.
މާލޭގައި ކަރަންޓުގެ ހިދުމަތްދޭން ފެށިތާ 73 އަހަރު ފުރުން ފާހަގަކުރުމުގެ ގޮތުން ސްޓެލްކޯއިން ބޭއްވި ޖަލްސާ ޝަރަފްވެރިކޮށްދެއްވައި ވާހަކަދައްކަވަމުން ނައިބު ރައީސް ވިދާޅުވީ މި ސަރުކާރުން ވެރިކަމަށް އައިރު ރައްޔިތުންގެ އެންމެ ބޮޑު ކަންބޮޑުވުމެއް އޮތީ ކަރަންޓުގެ ހިދުމަތާ މެދުގައި ކަމަށެވެ.
"ރައްޔިތުންގެ އެންމެ ބޮޑަށް ފާހަގަ ކުރި އެއް ކަމަކީ ރަށު މެދުގައި ހުރި އިންޖީނުގެތައް، އެ ދުވަސްވަރަށް ރަނގަޅު އެއީ 20، 30 އަހަރު ކުރިން ކޮށްފައި ހުރި ކަމެއްވާތީ، އެކަމަކު ރަށު މެދުގައި ހުރުމުގެ ސަބަބުން ސިއްހީ ގޮތުންނާއި އެކި ގޮތްގޮތުން އެ ވާ އުނދަގޫ،" ނައިބު ރައީސް ވިދާޅުވި އެވެ.
ރައްޔިތުންގެ މި ޝަކުވާއަށް ހައްލު ގެނެސްދިނުމުގެ ގޮތުން ރައީސް އިބްރާހިމް މުހައްމަދު ސޯލިހުގެ އިސްނެންގެވުމުގެ މަތީން ގިނަ މަސައްކަތްތަކެއް ކުރެވި، ބޮޑު ކާމިޔާބީއެއް ހޯދިފައިވާ ކަމަށް ވެސް އެމަނިކުފާނު ވިދާޅުވި އެވެ.
"މިއަދު ސްޓެލްކޯ އާއި ފެނަކަ ދެ ކުންފުނި އެއްކޮށް ގާތްގަނޑަކަށް 100 އަށް ވުރެ ގިނަ އާ އިންޖީނުގެ މިވަނީ ރަށުގެ އެހެން ފަރާތަކަށް ބަދަލު ކުރެވި، އޮފީސް އިމާރާތްތައް ވެސް އެޅިފައި، މިއީ ރިކޯޑު އަދަދެއް،" ނައިބު ރައީސް ވިދާޅުވި އެވެ.
އަދި، މި ދެ ކުންފުނި މެދުވެރިކޮށް 300 އަށް ވުރެ ގިނަ އާ ޖެނެރޭޓަރު ރަށްރަށަށް ސަޕްލައި ކޮށްދެވިފައިވާ ކަން ވެސް ފާހަގަކުރެއްވި އެވެ.
މި އަދަދުތައް މިގޮތަށް ކިޔާލުމުން ގަބޫލުކުރަން އުނދަގޫވާނެ ކަން ފާހަގަ ކުރައްވައި އެމަނިކުފާނު އިތުރަށް ވިދާޅުވީ އެއީ "ހަމަ އަޖައިބެއް" ކަމަށެވެ.
