ޕާކިސްތާނުގެ ޕޮލިސް ސްޓޭޝަނެއް ހިސޯރުކޮށްގެން ތިބި 33 މީހުން މަރާލައި، އެ ތަން އަލުން ފުލުހުންގެ ކޮންޓްރޯލްގެ ދަށަށް ގެނެސްފައިވާ ކަމަށް ޑިފެންސް މިނިސްޓަރު ވިދާޅުވެއްޖެ އެވެ.
ހުޅަނގު އުތުރު ބަންނޫ ޑިސްޓްރިކްޓުގެ ޕޮލިސް ސްޓޭޝަން އާދީއްތަ ދުވަހު ހިފީ ޕާކިސްތާން ތާލިބާން ގްރޫޕުގެ ހަނގުރާމަވެރިންނެވެ.
އެ ވަގުތު ސެކިއުރިޓީ އޮފިޝަލުންނާ އެކު ގިނަ ބަޔަކު ސްޓޭޝަން ތެރޭގައި ތިއްބެވެ.
ޑިފެންސް މިނިސްޓަރު ހަވާޖާ މުހައްމަދު އާސިފް ވިދާޅުވީ ޕޮލިސް ސްޓޭޝަން ހިސޯރު ކުރުމަށް ފަހު ރަހީނުންގެ ގޮތުގައި ހިފެހެއްޓި އެންމެން މިނިވަންކޮށްފައިވާ ކަމަށެވެ.
އެ މަސައްކަތުގެ ތެރެއިން ހާއްސަ ފައުޖުގެ ދެ މެމްބަރުން މަރުވި އެވެ. އަދި ސިފައިންގެ 15 ވަރަކަށް މީހުންނަށް އަނިޔާވި އެވެ.
އެ ހަމަލާގެ ޒިންމާ އުފުލީ ތެހްރީކޭ ތާލިބާން ޕާކިސްތާ ނުވަތަ ޓީޓީޕީ އިންނެވެ. ޓީޓީޕީގެ ހަމަލާތައް އިތުރު ކުރީ މިދިޔަ މަހު ސުލްހައިގެ އެއްބަސްވުމަށް އަމަލު ކުރުން ހުއްޓާލުމަށް ފަހު އެވެ.
ޓީޓީޕީ ހަރަކާތްތެރިވާން ފެށީ 2007 ވަނަ އަހަރު އެވެ. ޕާކިސްތާނުގައި ހިންގި އަސްކަރީ އޮޕަރޭޝަނެއްގައި 2014 ވަނަ އަހަރު އެ ގްރޫޕް ހަރަކާތްތެރިވުން ހުއްޓުވި އެވެ. އެހެން ނަމަވެސް، އަލުން ހަރަކާތްތެރިވާން ފެށި އެވެ.
ޕާކިސްތާނުގެ ތާލިބާނުންނާއި އަފްގާނިސްތާނުގެ ތާލިބާނުންނަކީ ތަފާތު ދެ ގްރޫޕެއް ނަމަވެސް، ދެ ގްރޫޕުގެ ވިސްނުން އެއް ގޮތެވެ.
