ޗައިނާއާ ހިޔާލު ތަފާތުވުން އުފެދިފައިވާ ބޯޑަރު ސަރަހައްދުގައި އިންޑިއާ ސިފައިންގެ އަދަދު އިތުރުކޮށްފައިވާ ކަމަށް އެ ގައުމުގެ ފޮރިން މިނިސްޓަރު ވިދާޅުވެއްޖެ އެވެ.
އެސް ޖޭޝަންކަރް ވިދާޅުވީ ބޯޑަރުގެ "ސްޓެޓަސް ކޯ" ނުވަތަ ހާލަތު ބަދަލު ކުރުމުގެ ފުރުސަތު ޗައިނާއަށް ނުދޭނެ ކަމަށެވެ.
ދާދި ފަހުން އިންޑިއާގެ އަރޫނަޗަލް ޕްރަދޭޝް ސްޓޭޓުގަައި ހިޔާލު ތަފާތުވުން އުފެދިފައި އޮންނަ ބޯޑަރު ސަރަހައްދުގައި އިންޑިއާ އާއި ޗައިނާގެ ސިފައިން ހަމަލާ ބަދަލުކުރި އެވެ.
އިންޑިއާއިން ބުނީ ހަމަލާ ދޭން ފެށީ ޗައިނާ ސިފައިން އެއްބަސްވުމާ ހިލާފުވުމުން ކަމަށެވެ. އެގޮތުން "ލައިން އޮފް އެކްޗުއަލް ކޮންޓްރޯލް" ކައިރިއަށް ދެ ގައުމުން ވެސް ނުދިޔުމަށް އެއްބަސްވެފައި އޮއްވައި ޗައިނާ ސިފައިން އެ ތަނާ ކައިރިވި ކަމަށް ބުންޏެވެ.
ޗައިނާގެ ފޮރިން މިނިސްޓްރީން ބުނީ ބޯޑަރުގެ ކައިރީގެ ހާލަތު "އާއްމުކޮށް ސްޓޭބަލް" ކަމަށެވެ. އަދި ދެ ގައުމުން ވެސް ހިޔާލު ތަފާތުވާ ކަންކަމުގައި މަޝްވަރާ ކުރަމުންދާ ކަމަށް ބުންޏެވެ.
އިންޑިއާ އާއި ޗައިނާއާ ދެމެދު ހިޔާލު ތަފާތުވުން އުފެދިފައިވާ 3،440 ކިލޯމީޓަރުގެ ބޯޑަރު ސަރަހައްދެއް އޮވެ އެވެ. އެ ސަރަހައްދުގައި ދޭތެރެ ދޭތެރެއިން ހަމަލާ ބަދަލުކުރެ އެވެ.
ޖޫން 2020 ވަނަ އަހަރު ލަޑަކް ސަރަހައްދުގައި އޮންނަ ގަލްވަން ވެލީގައި ބޮޑު ކުރިމަތިލުންތަކެއް ހިނގުމަށް ފަހު ދެ ގައުމުން ވެސް މަސައްކަތް ފެށީ ސުލްހަ ދެމެހެއްޓޭތޯ އެވެ. އެ ފަހަރު އިންޑިއާގެ 20 ސިފައިންނާއި ޗައިނާގެ ހަތަރު ސިފައިން މަރުވި އެވެ.
ބޯޑަރު ކައިރީގައި އިންޑިއާ ސިފައިން އިތުރުކުރި ކަމަށް ބުނެފައިވާ އިރު، އެކަމާ ގުޅޭ ގޮތުން ޗައިނާއިން އަދި ވަކި އެއްޗެއް ނުބުނެ އެވެ.
