މާލޭގައި މިހާރުވެސް ގަރާޖު ހިންގަމުންދާ ފަރާތްތަކުގެ ތެރެއިން، ހުޅުމާލޭގައި ގަރާޖު ހިންގުމަށް ޝައުގުވެރިވާ ފަރާތްތަކަށް އަމާޒުކޮށްގެން 23 ބިމެއް ކުއްޔަށް ދޫކުރުމަށް ނިންމައި، އެ ބިންތައް ކުއްޔަށް ހިފުމަށް އެދި ފޯމު ހުށަހެޅުމުގެ ފުރުސަތު އެޗްޑީސީން މިއަދު ހުޅުވާލައިފި އެވެ.
ފަސް އަހަރު ދުވަހުގެ މުއްދަތަކަށް ކުއްޔަށް ދޫކުރުމަށް ނިންމާފައިވާ މި ބިންތައް ކުއްޔަށް ހިދުމަށް އެދި ފޯމު ހުށަހެޅޭނެ އެންމެ ފަހު ތާރީހަކީ އަންނަ ޖެނުއަރީ މަހުގެ ދެވަނަ ދުވަހެވެ.
އެ ކޯޕަރޭޝަނުން މިއަދު ކުރި އިއުލާނުގައި، އެ ބިންތައް ކުއްޔަށް ހިފުމަށް އެދި ފޯމު ހުށަހަޅާ ފަރާތްތަކުގެ ހުންނަން ޖެހޭނެ ކަމަށް ކަނޑައަޅާފައި ވަނީ ތިން ޝަރުތެކެވެ.
އެއީ، އެ ކޯޕަރޭޝަނަށް އެއްވެސް މިންވަރަކަށް ފައިސާ ދައްކަން ޖެހި، އެފައިސާ ނުދައްކާ އޮތް ފަރާތެއް ކަމުގައި ނުވުމާއި، ފޯމު ހުށަހަޅާ ފަރާތަކީ އުމުރުން އަށާރަ އަހަރުވެފައިވާ ފަރާތަކަށްވުމާއި، އެ ފަރާތަކީ މިހާރުވެސް މާލެ ސަރަހައްދުގައި ސިނާއީ މަސައްކަތް ކުރަމުންދާ އަމިއްލަ ފަރުދެއް ނުވަތަ އިކޮނޮމިކް މިނިސްޓްރީގައި ރަޖިސްޓަރީ ކޮށްގެން ގަރާޖު ހިންގަމުންދާ ފަރާތެއް ކަމުގައި ވުމެވެ.
ހުޅުމާލެއިން ކުއްޔަށް ދޫކުރުމަށް ހުޅުވާލި ބިންތަކުގެ ކުރެހުމެއް -- ފޮޓޯ އެޗްޑީސީ
ބިންތައް ކުއްޔަށް ހިފުމަށް އެދި ހުށަހަޅަން ޖެހޭ ފޯމު، އެ ކޯޕަރޭޝަނުގެ ވެބްސައިޓުންނާއި ހުޅުމާލޭގައި ހުންނަ އެޗްޑީސީ އޮފީހުގެ ރިސެޕްޝަނުން ވެސް ލިބޭނެ ކަމަށް އެ ކޯޕަރޭޝަނުން ބުނެ އެވެ.
މި އިއުލާނާ އެކު ވަނީ ހުޅުމާލޭގައި ކުއްޔަށް ދޫކުރުމަށް ނިންމާފައިވާ ބިންތަކުގައި ގަރާޖު ހިންގޭނެ ގޮތުގެ އާންމު އުސޫލެއް ވެސް ހިމަނާފަ އެވެ.
އެ އުސޫލުގައި ކުއްޔަށް ދޫކުރާ ބިން ބޭނުން ކުރެވޭނެ ގޮތާއި، ގަރާޖު އިމާރާތް ކުރެވޭނެ އުސްމިނާއި، އެތަނުގައި ބިންގާ އަޅަންޖެހޭނެ ފުންމިނާއި، އިމާރާތުގެ ވަށާ ފާރު ރޭނޭނެ އުސްމިނުގެ އިތުރުން އިމާރާތުގެ ޑިޒައިންއާ ބެހޭ މައުލޫމާތު ވެސް ހިމަނާފައިވެ އެވެ.
ކުދިކުދި ތަންތަންކޮޅުގައި ގަރާޖު ހިންގުމުން ކުރިމަތިލާން ޖެހޭ ބޮޑެތި ނުރައްކާތަކުން ރައްކާތެރިވުމަށް އެޗްޑީސީން ކުރަމުން އަންނަ މަސައްކަތުގެ ތެރެއިން މިފަހަރު ހުޅުވާލި 23 ބިމުގެ ތެރޭގައި ހިމެނެނީ:
- 1000 އަކަފޫޓާއި 1100 އަކަފޫޓާ ދެމެދުގެ ބާރަ ބިން
- 1100 އަކަފޫޓާއި 1200 އަކަފޫޓާ ދެމެދުގެ ދެ ބިން
- 1200 އަކަފޫޓާއި 1300 އަކަފޫޓާ ދެމެދުގެ ދެ ބިން
- 1500 އަކަފޫޓާއި 2000 އަކަފޫޓާ ދެމެދުގެ ދެ ބިން
- 2600 އަކަފޫޓުގެ އެއް ބިން
- 3000 އަކަފޫޓާއި 4000 އަކަފޫޓާ ދެމެދުގެ ދެ ބިން
- 4100 އަކަފޫޓުގެ އެއް ބިން
- 5800 އަކަފޫޓުގެ އެއް ބިން
އެ ކޯޕަރޭޝަނުން ބުނީ އެ ބިންތައް ކުއްޔަށް ހިފުމަށް އެދި ހުށަހަޅަން ޖެހޭނީ ފޯމުގައި ހުރި ލިޔުންތަކާ ހުރިހާ ލިޔުންތަކާ އެކުގައި ކަމަށެވެ. އަދި ހުށަހުޅާ ފޯމުތައް ބެލުމަށް ފަހު އިތުރު މައުލޫމާތު ބޭނުންވާ ފަރާތްތަކަށް އެ ކޯޕަރޭޝަނުން ގުޅާނެ ކަމަށް އެޗްޑީސީން ބުނެ އެވެ.
މި އިއުލާނާ ބެހޭ އިތުރު މައުލޫމާތު ހޯދުމަށް އެ ކުންފުނީގެ ނަންބަރު 1516 އިންނާއި އެ ކޯޕަރޭޝަނުގެ އޮފީސް ރިސެޕްޝަނުން ލިބޭނެ އެވެ.
