ކެނެޑާގެ ވާން ސިޓީގެ ފްލެޓްތަކެއް ކައިރީގައި ބަޑި ޖަހައި ފަސް މީހުން މަރާލައިފި އެވެ.
އެ ހާދިސާ ހިނގީ ޓޮރޮންޓޯގެ އުތުރުން 30 ކިލޯމީޓަރު ދުރުން ވާން ސިޓީގަައި އާދީއްތަ ދުވަހުގެ ރޭ ކަމަށް ފުލުހުން ބުންޏެވެ. ރިޕޯޓު ލިބުމާ އެކު ފުލުހުން އެ ތަނަށް ގޮސް، ތުހުމަތު ކުރެވޭ މީހާގެ ގަޔަށް ބަޑި ޖަހައި މަރާލި އެވެ.
ފަސް މީހުން މަރުވެފައިވާ އިރު، އަނިޔާވެގެން ހޮސްޕިޓަލުގައި ފަރުވާދެމުންދާ އެކަކުގެ ހާލު ސީރިއަސް އެވެ.
ހަމަލާދިން ސަބަބު ދެނެގަތުމުގެ މަސަައްކަތް ކުރަމުންދާ އިރު، ބަޑި ޖެހި މީހާ އާއި އޭނާގެ ޓާގެޓަކަށް ވީ މީހުންނާ އެއްވެސް ގުޅުމެއް އޮތްތޯ ދަނީ ބަލަމުންނެވެ.
ޔޯކް ފުލުހުންގެ ޗީފް ޖިމް މެކްސްވީން ވިދާޅުވީ ފުލުހުންނަށް ފެނުނީ ބިރުވެރި މަންޒަރެއް ކަމަށާއި އިމާރާތުގެ އެކި ފްލެޓްތަކުގައި މީހުން މަރުވެފައި ތިބި ކަމަށެވެ.
ކެނެޑާއާ އަވައްޓެރި އެމެރިކާއަކީ ބަޑީގެ ހާދިސާތައް އެންމެ ގިނައިން ހިނގާ ގައުމެވެ. އެއާ ހިލާފަށް ކެނެޑާއަކީ އާއްމުކޮށް ވަރަށް ސުލްހަވެރި އަމާން ގައުމެކެވެ.
އެހެން ނަމަވެސް، ފަހަކަށް އައިސް ބަޑި ބޭނުންކޮށްގެން ދޭ ހަމަލާތައް ކެނެޑާގައި ވެސް ދަނީ އިތުރުވަމުންނެވެ. އަތުގައި ގެންގުޅޭ ކުދި ބަޑި ނުވަތަ "ހޭންޑްގަން" މަނާކުރުމަށް ނިންމީ އެހެންވެ އެވެ.
އެގޮތުން މޭ 2020 ގައި އެ ގައުމުން ނިންމީ 1500 ބާވަތެއްގެ ހަތިޔާރު މަނާކުރުމަށެވެ. އެއީ ފުލުހަކަށް ހެދިގެން ހުރި މީހަކު ނޯވާ ސްކޮޓިއާގައި ބަޑި ޖަހައި 22 މީހުން މަރާލި ހާދިސާއަށް ފަހު އެވެ.
