ޓިއުނީޝިއާގެ އާއްމު އިންތިހާބުގައި ވޯޓުލީ ޝަރުތު ހަމަވާ މީހުންގެ އެންމެ ނުވަ ޕަސެންޓު ކަމަށް ވާތީ ރައީސް ކައިސް ސައީދުގެ އިސްތިއުފާއަށް އިދިކޮޅު ޑިމާންޑުކޮށްފި އެވެ.
އިދިކޮޅު ޕާޓީތައް ހިމެނޭ ނޭޝަނަލް ސެލްވޭޝަން ފްރަންޓުގެ ވެރިޔާ ނެޖީބް ޗެއްބީ ވިދާޅުވީ ހޮނިހިރު ދުވަހު އިންތިހާބަކީ "ބޮޑު އޮޅުންބޮޅުމެއް" ކަމަށާއި ރިޔާސީ އިންތިހާބަކޮށް ޑިމާންޑުކޮށް މުޒާހަރާއަށް ބާރުއަޅާ ކަމަށެވެ.
އިދިކޮޅު ގިނަ ޕާޓީތަކުން އިންތިހާބު ބޮއިކޮޓް ކުރި އެވެ. އެ މީހުން ތުހުމަތު ކުރާ ގޮތުގައި 2011 ވަނަ އަހަރަށް ފަހު ޓިއުނީޝިއާއިން ހޯދި ޑިމޮކްރެޓިކް ކުރިއެރުންތައް ގެއްލުން ފަށާފައިވަނީ ރައީސް ސައީދުގެ ސަބަބުންނެވެ. އެމަނިކުފާނު އެކަން ދޮގުކުރައްވަ އެވެ.
ޖުލައި 2021 ގައި ބޮޑު ވަޒީރު މަގާމުން ވަކިކޮށް، ޕާލަމެންޓް އުވާލުމަށް ފަހު ރައީސަށް ގިނަ ބާރުތަައް ލިބިދޭ އާ ގާނޫނު އަސާސީއެއް ފާސްކުރި އެވެ. ގާނޫނު އަސާސީއަށް ރުހުން ދިނުމުގެ ވޯޓުގައި ވެސް އިދިކޮޅުން ބައިވެރި ނުވެ އެވެ.
އުމުރުން 64 އަހަރުގެ ސައީދް ވިދާޅުވަނީ އާ ގާނޫނު އަސާސީއެއް ގެންނަން ޖެހުނީ ސިޔާސީ ކޯޅުންތައް ގިނަވެ، އިގުތިސާދީ ގޮތުން ގައުމު ވެއްޓެމުން ދާތީ ކަމަށެވެ.
އާއްމު އިންތިހާބުގައި އެހާ މަދު އަދަދެއްގެ ބަޔަކު ވޯޓުލުމުން، ސައީދް މިހާތަނަށް ވަކި އެއްޗެއް ވިދާޅެއް ނުވެ އެވެ.
