ކޮވިޑް ކޭސްތައް ވަރަށް ބޮޑަށް އިތުރުވާން ފަށާފައި ވާތީ ޗައިނާގެ އެންމެ ބޮޑު ސިޓީ ޝަންހާއީގެ ސްކޫލްތައް ބަންދުކޮށް ކިޔެވުން އޮންލައިންކޮށް ކުރިއަށް ގެންދަން ނިންމައިފި އެވެ.
ސްކޫލްތަކުގެ އިތުރުން އެންމެ ކުޑަކުދިން ބަލަހައްޓާ ނާސަރީތަކާއި ޑޭކެއާ ސެންޓަރުތައް ވެސް ހޯމަ ދުވަހުން ފެށިގެން ބަންދުވާނެ ކަމަށް ޝަންހާއީ އެޑިޔުކޭޝަން ބިޔުރޯއިން އެންގި އެވެ.
ޗައިނާއިން ކޮވިޑް އެއްކޮށް ނައްތާލަން ގެންގުޅޭ ޒީރޯ ކޮވިޑް ސިޔާސަތާ ދެކޮޅަށް އާއްމުން މުޒާހަރާ ކުރަން ފެށުމުން، މި މަހުގެ ކުރީކޮޅު ބޮޑެތި ލުއިތަކެއް ދިނެވެ.
އެހެން ނަމަވެސް. ލުއި ދިނުމާ އެކު އަލުން ކޭސްތައް އިތުރުވެދާނެކަމުގެ ކަންބޮޑުވުން އުފެދުނެވެ. ހޮސްޕިޓަލްތަކާއި މެޑިކަލް ފެސިލިޓީތަކަށް ބާރުބޮޑުވާން ފަށާފައިވާ އިރު، ވަގުތީ ހެލްތު ސެންޓަރުތަކާއި އައިސީޔޫ ފެސިލިޓީތައް ވަނީ ބައެއް ހިސާބުތަކުގައި ގާއިމްކޮށްފަ އެވެ.
ރިޕޯޓުތައް ބުނާ ގޮތުން ކޮވިޑް ބަލި މީހުންނަށް ހާއްސަ އިތުރު 230،000 އެނދު ޝަންހާއީގައި އެކަނިވެސް ވަގުތީ ގޮތުން ގާއިމްކުރި އެވެ.
ސްކޫލްތައް ބަންދު ކުރަން ނިންމުމުގެ ކުރިން ވެސް ބައެއް ސްކޫލްތަކުގެ ކިޔެވުން އޮތީ އޮންލައިންކޮށް ބަދަލުކޮށްފަ އެވެ. އެއީ ގިނަ ޓީޗަރުންނާއި މުވައްޒަފުން ބަލިވެ އުޅޭތީ އެވެ.
ޗައިނާގައި ފިޔަވަޅުތަކަށް ލުއި ދިން އިރު، ކޭސްތައް އިތުރުވެދާނެ ކަމަށް ތައްޔާރުވެފައެއް ނުވެ އެވެ. އާބާދީގައި ހިމެނޭ އެތައް މިލިއަން އުމުރުން ދުވަސްވީ މީހުން ވެކްސިން ފުރިހަމައެއް ނުކުރެ އެވެ.
