މާލެ އާއި ތިލަފުއްޓާ ދެމެދު އަޅާ ބުރިޖުގެ މަސައްކަތް ކުރަމުންދާ އިންޑިއާގެ އެފްކޮންސް ކުންފުނީގެ މުވައްޒަފުން ގުޅީފަޅުގައި ހަމަނުޖެހުން ހިންގަމުންދާ ކަމަށް ފުލުހުން މިއަދު ބުނެފި އެވެ.
ގުޅީފަޅުގައި ގިނަ އަދަދެއްގެ މުވައްޒަފުން އެއްވެފައިވާ މަންޒަރު ފެންނަ މަންޒަރު ފެންނަ ވީޑިއޯއެއް އާންމުވެފައިވާއިރު މި ހަމަނުޖެހުން ފެށިފައިވަނީ މިދިޔަ ބުރާސްފަތި ދުވަހުގެ ރޭ އެ ކުންފުނީގެ މުވައްޒަފުން ދިރިއުޅޭ އެކޮމަޑޭޝަން ބްލޮކުގައި ހިނގި އަލިފާނުގެ ހާދިސާއާ ގުޅިގެން ކަމަށް ޕްލޭނިން މިނިސްޓްރީގެ ޕްރޮޖެކްޓް މެނޭޖިންގް ޑިޕާޓްމަންޓް ޔުނިޓުގެ މުހައްމަދު ޖިނާހު ވަނީ "އަދަދު" އަށް މައުލޫމާތު ދެއްވާފަ އެވެ.
އެގޮތުން އަލިފާނުގެ ހާދިސާގައި ގިނަ ބައެއްގެ ތަކެތި އެނދުމާ ގުޅިގެން ނުރުހުން ފާޅުކޮށްފައިވާ ކަމަށާއި އެފްކޮންސްގެ އޮފިޝަލުން މިހާރު ދަނީ އެކަން ހައްލުކުރަން މަސައްކަތް ކުރަމުން ކަމަށް ޖިނާހު ވިދާޅުވި އެވެ.
މިކަމާ ގުޅިގެން "އަދަދު" އިން ސުވާލުކުރުމުން ފުލުހުންގެ މީޑިއާ އޮފިޝަލް ވިދާޅުވީ ގުޅީފަޅުގައި އެފްކޮންސްގެ މުވައްޒަފުން ހަމަނުޖެހުން ހިންގާ ކަމުގެ މައުލޫމާތު މިއަދު ހެނދުނު 10:32 ހާއިރު އެ ހިދުމަތަށް ލިބިފައިވާ ކަމަށެވެ.
އަދި މިކަމާ ގުޅިގެން އެ ސަރަހައްދުގައި މިހާރު ފުލުހުން ހަރަކާތްތެރިވަމުންދާ ކަމަށް ފުލުހުން ވަނީ ބުނެފަ އެވެ.
ބުރާސްފަތި ދުވަހުގެ ރޭ ހިނގި އަލިފާނުގެ ހާދިސާގައި ތެރެއިން 73 މީހަކަށް އަނިޔާވި އެވެ. 13 މީހަކު އައިޖީއެމް ހޮސްޕިޓަލަށް އަދި 60 މީހުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ގެންގޮސް ފަރުވާ ދެމުން އެބަ ދެ އެވެ.
