ހޮލީވުޑްގެ ތަރި މާގޮޓް ރޮބީ ލީޑް ރޯލުން ފެނިގެންދާ ފިލްމު "ބާބީ" ގެ ފުރަތަމަ ޓީޒާ ޓްރެއިލާ ވޯނާ ބްރޯޒް ކުންފުނިން ދައްކާލައިފި އެވެ.
ފިލްމުގެ ޕްލޮޓާ ގުޅޭ މައުލޫމާތު ސިއްރުކޮށްގެން އުޅޭ އިރު، ބެލެވޭ ގޮތުގައި ފިލްމުގައި ފެނިގެން ދާނީ ކުޑަކުދިންނާއި ބޮޑެތި މީހުންގެ މެދުގައި މަގްބޫލް ބުދު ބާބީ އާއި އޭނާގެ އެކުވެރި ކެން އިންސާނުންގެ ތެރޭގައި އުޅޭ އިރު ދިމާވާ ހާދިސާތަކެވެ. އެގޮތުން އަސްލު އިންސާނެއްގެ ގޮތުގައި ބާބީ އުޅެން ޖެހުމުން ކުރިމަތިވާ ގޮންޖެހުންތައް ފެނިގެން ދާނެ އެވެ.
ފިލްމުގައި ބާބީގެ އެކުވެރި ކެންގެ ރޯލުން ފެނިގެން ދަނީ އެކްޓަރު ރަޔަން ގޮސްލިންގް އެވެ. ފިލްމުގެ ކާސްޓުގައި ދެން ހިމެނެނީ ވިލް ފެރެލް، އެމާ މެކީ، ކޮނޯ ސްވިންޑެލްސް ފަދަ ފަރާތްތަކެވެ.
ފިލްމު ޑިރެކްޓު ކުރަނީ ގްރެޓާ ގާވިގް އެވެ. ފިލްމުގެ ސްކްރިޕްޓް ލިޔުނީ އޭނާ އާއި ނޮއާ ބޯމްބެކް ގުޅިގެންނެވެ. ފިލްމު ޕްރޮޑިއުސް ކުރަނީ މެޓެލް ފިލްމްސް، ހޭޑޭ ފިލްމް އަދި ލަކީޗެޕް އެންޓަޓެއިންމެންޓުންނެވެ.
ފިލްމުގެ ޕްރޮޑަކްޝަން މަސައްކަތް ފެށީ މި އަހަރުގެ ކުރީކޮޅު ލަންޑަންގަ އެވެ. ރިޕޯޓުތައް ބުނާ ގޮތުން ޖުލައި މަހުގެ ކުރިން ޝޫޓިން ނިންމާލި އެވެ. ފިލްމު ރިލީޒް ކުރުމަށް ހަމަޖެހިފައި ވަނީ އަންނަ އަހަރުގެ ޖުލައި 21 ވަނަ ދުވަހު އެވެ.
