އެފްރިކާގެ ގައުމެއް ކަމުގައި ޔުގެންޑާގެ ހުޅަނގު ދެކުނުގައި ކަނޑުގެރި ނުވަތަ ހިޕޮޕޮޓަމަސްގެ ހަމަލާއަކުން ދެ އަހަރުގެ ކުއްޖަކު ސަލާމަތްވެއްޖެ އެވެ.
އީގާ ޕޯލް ނަމަކަށް ކިޔާ ފިރިހެން ކުއްޖާއަށް ކަނޑުގެރި ހަމަލާ ދިނީ ލޭކް އެޑްވާޑްގެ އައްސޭރިފަށުގައި ކުޅެން އުޅެނިކޮށެވެ.
ފުލުހުން ބުނީ ކަނޑުގެރި އެ ކުއްޖާ ޖަހައި ގަނެ، "ހަށިގަނޑުގެ އެއްބައި ދިރުވާލި" ކަމަށެވެ. އެ ކުއްޖާ ސަލާމަތްވީ އެ އަވަށުގެ ފިރިހެނަކު ކަނޑުގެރިއާ ދިމާލަށް ގާ އުކައި ކުރި މަސައްކަތުންނެވެ.
ފުލުހުން ބުނީ ޑިސެމްބަރު ހަތަރު ވަނަ ދުވަހުގެ ހާދިސާއަަށް ފަހު ފިރިހެން ކުއްޖާއަށް މެޑިކަލް ސެންޓަރެއްގައި ފަރުވާ ދިން ކަމަށެވެ.
އޭގެ ފަހުން ބްވެރާ ހޮސްޕިޓަލަށް ބަދަލުކޮށް، ރައްކާތެރިކަމުގެ ފިޔަވަޅެއްގެ ގޮތުން ރޭބީޒް ވެކްސިން ދިނެވެ. ރޭބީޒްއަކީ ބައެއް ކަހަލަ ޖަނަވާރުންގެ ގައިން އިންސާނުންނަށް ފޯރާ ޖަރާސީމެކެވެ.
ފުލުހުން ބުނީ އެއީ ލޭޑް އެޑްވާޑްގައި އުޅޭ ކަނޑުގެރިއެއް މީހަކަށް ހަމަލާ ދިން ފުރަތަމަ ފަހަރު ކަމަށެވެ. ބަރުދަނުގައި 1.5 ޓަނު ހުންނަ ކަނޑުގެރީގެ ހަމަލާތަކުގައި އެފްރިކާގައި އަހަރަކު 500 މީހުން މަރުވާ ކަމަށް ބެލެވެ އެވެ.
ކަނޑުގެރިއަކީ އެއްގަމުގައި ދިރިއުޅޭ ތިން ވަނައަށް އެންމެ ބިޔަ މެމަލް އެވެ. އޭގެ ދަތްތައް 50.8 ސެންޓިމީޓަރަށް ދިގުވެ އެވެ. އެއީ ބިޔަ ޖަނަވާރެއް ނަމަވެސް، ގަޑިއަކު 20 މޭލު ބާރުމިނުގައި ދުވެވެ އެވެ.
ކަނޑުގެރިއަކީ އާއްމުކޮށް ގަސްގަހާގެހި ކައިގެން އުޅޭ ޖަނަވާރެކެވެ. އެހެން ނަމަވެސް، އެ ތަކެތި އުޅޭ މާހައުލަށް ނުރައްކަލެއް ނުވަތަ އުނދަގުލެއް ވެއްޖެ ނަމަ، ހަމަލާ ދިނުމަކީ އެކަށީގެންވާ ކަމެކެވެ.
