ޓްވިޓާއާ ގުޅޭ ކަންކަން ރިޕޯޓު ކުރާ ނޫސްވެރިންތަކެއްގެ އެކައުންޓް ސަސްޕެންޑް ކުރަން އެ ޕްލެޓްފޯމުން ނިންމުމުން، އދ. އާއި ޔޫރަޕިއަން ޔޫނިއަން (އީޔޫ) އިން ކަންބޮޑުވުން ފާޅުކޮށްފި އެވެ.
ހުކުރު ދުވަހު އެކައުންޓް ސަސްޕެންޑް ކުރި ނޫސްވެރިންގެ ތެރޭގައި ނިއު ޔޯކް ޓައިމްސް، ސީއެންއެން އަދި ވޮޝިންޓަން ޕޯސްޓުގެ ނޫސްވެރިން ހިމެނެ އެވެ.
އދ. އިން ކުރި ޓްވީޓެއްގައި ބުނީ ނޫސްވެރިކަމުގެ މިނިވަންކަމަކީ "ކުޅޭ އެއްޗެއް ނޫން" ކަމަށެވެ. އީޔޫއިން ވަނީ ޓްވިޓާއާ ދެކޮޅަށް ފިޔަވަޅު އަޅާނެކަމުގެ އިންޒާރު ދީފަ އެވެ.
ޓްވިޓާގެ ތަރުޖަމާނަކު އެމެރިކާގެ ނޫސްތަކަށް ވިދާޅުވީ ނޫސްވެރިންގެ އެކައުންޓްތައް ސަސްޕެންޑް ކުރުން ގުޅިފައި ވަނީ "ރިއަލް ޓައިމްކޮށް" ލޮކޭޝަން ހާމަކުރުން މަނާކުރާ ސިޔާސަތާ ކަމަށެވެ.
"ނޫސްވެރިކަމުގެ މިނިވަންކަމަކީ ކުޅޭ އެއްޗެއް ނޫން. މިނިވަން ނޫސްވެރިކަމަކީ ޑިމޮކްރެޓިކް މުޖުތަމައުތަކުގެ އެއް އަސާސް އަދި ގެއްލުންދެނިވި ނުރަނގަޅު މައުލޫމާތާ ދެކޮޅު ހަނގުރާމައިގައި މުހިއްމު އެއްޗެއް،" އދ. ގެ އަންޑާ ސެކެޓްރީ ފޯ ގްލޯބަލް ކޮމިއުނިކޭޝަން މެލިސާ ފްލެމިންގް ވިދާޅުވި އެވެ.
އީޔޫގެ ކޮމިޝަނަރު ވެރާ ޖޮރޮވާ ހުކުރު ދުވަހު ވިދާޅުވީ ޔޫރަޕަށް އަލަށް ތައާރަފު ކުރި ޑިޖިޓަލް ސެކިއުރިޓީ ގާނޫނުގެ ދަށުން ޓްވިޓާއާ ދެކޮޅަށް ފިޔަވަޅު އެޅުމުގެ ފުރުސަތު އެބަ އޮތް ކަމަށެވެ.
"އެލޮން މަސްކަށް އެކަން ސާފުވާން ޖެހޭ. ރަތް ރޮނގުތަކެއް އެބަހުރި. އޭގެ ފަހުން ވަރަށް އަވަހަށް ފިޔަވަޅުތައް އަންނާނެ،" އޭނާ ވިދާޅުވި އެވެ.
އެކައުންޓްތައް ސަސްޕެންޑް ކުރުމާ ގުޅޭ ގޮތުން ޓްވިޓާގެ ވެރިޔާ މަސްކް ސީދާ އެއްޗެއް ނުބުނެ އެވެ. އެހެން ނަމަވެސް ޓްވީޓަކަށް ދިން ރައްދެއްގައި އޭނާ ބުނީ "މުޅި ދުވަހު ފާޑުކިޔަސް ވަރިހަމަ" ކަމަށާއި އެކަމަކު އޭނާގެ "ރިއަލް ޓައިމް ލޮކޭޝަން ހާމަކޮށް އާއިލާ ނުރައްކަލަށް ހުށަހެޅުން ވަރިހަމަ ނޫން" ކަމަށެވެ.
މީހުން އެ ވަގުތެއްގައި ތިބި ތަނެއް ނުވަތަ ދަތުރު ކުރަމުންދާ ތަނެއް ހާމަކުރާ އެކައުންޓްތައް މަނާކުރަން ޓްވިޓާއިން ނިންމީ މަސްކްގެ ދަރިފުޅު އިން ކާރެއް ފަހަތުން މީހަކު ގޮސް، އެ ކާރު ހުއްޓުވައި، ކާރުގެ މައްޗަށް އެރި ފަހުންނެވެ.
އެ ހާދިސާއާ ގުޅިގެން މަސްކް ނިންމީ އޭނާގެ ޕްރައިވެޓް ޖެޓް ޓްރެކްކޮށް އެ މައުލޫމާތު އާއްމު ކުރަމުން ދިޔަ ޓްވިޓާ އެކައުންޓުގެ ވެރިފަރާތާ ދެކޮޅަށް ކޯޓަށް ދިޔުމަށެވެ.
