އެއް މިލިއަން ލީޓަރުގެ ފެން ހުރި ބޮޑު މަސް ޓޭންކެއް ކުއްލިއަކަށް ގޮވައި ޖަރުމަނުވިލާތުގެ ބާލިންގެ ރެޑިސަން ބްލޫ ހޮޓަލާއި ކައިރި މަގުތަކުގައި ފެންބޮޑުވެއްޖެ އެވެ.
ފަނަރަ ސަތޭކައަށް ވުރެ ގިނަ މަސް ގެންގުޅެމުން ދިޔަ "އަކުއާޑޮމް" ޓޭންކަކީ 15.85 މީޓަރު އުސް ޓޭންކެކެވެ. އެ ޓޭންކު ހުންނަނީ ރެޑިސަން ބްލޫ ހޮޓަލުގެ ލޮބީގަ އެވެ.
އެ ޓޭންކު ކުއްލިއަކަށް ގޮވުމުން، ބިއްލޫރީގެ އަސަރުކޮށް ދެ މީހުންނަށް އަނިޔާވި އެވެ.
ފުލުހުން ބުނީ ބޮޑު ގެއްލުންތަކެއް ލިބިފައިވާ ކަމަށެވެ. ވީޑިއޯއަކުން ފެންނަނީ ހުސް ޓޭންކުން ހޮޓަލުގެ ލޮބީގެ ތެރެއަށް ފެން އެޅޭ މަންޒަރެވެ.
އެ ހާދިސާއާ ގުޅިގެން ހޮޓަލުގައި ތިބި ގެސްޓުން ވަނީ އެހެން ތަންތަަނަށް ބަދަލުކޮށްފަ އެވެ.
ބާލިންގެ ފަޔާ ބްރިގޭޑްގެ ތަރުޖަމާނަކު ބީބީސީއަށް ވިދާޅުވީ ގިނަ މަސްތައް މަރުވެފައިވާ ކަމަށާއި މިއީ ފިނި މޫސުން ކަމަށް ވާތީ މަސްތައް ސަލާމަތް ކުރަން އުނދަގޫވި ކަމަށެވެ. އެ ޓޭންކުގައި ތަފާތު 100 ބާވަތެއްގެ މަސް އުޅުނެވެ.
އެ ޓޭންކަށް ޒަމާނީ ބަދަލުތަކެއް ގެނައީ މީގެ ދެ އަހަރު ކުރިންނެވެ. ހޮޓަލަށް ޒިޔާރަތް ކުރާ މީހުން ބޭނުން ކުރުމަށް ހާއްސަ، ޓްރާންސްޕޭރެންޓު ލިފްޓެއް އެ ޓޭންކުގެ ތެރޭގައި ހުރެ އެވެ. ހޮޓަލުގެ ބައެއް ކޮޓަރިތަކަށް ވެސް ޓޭންކު ފެނެ އެވެ.
ބާލިންގެ ފަޔާ ބްރިގޭޑުން ބުނީ ޓޭންކު ގޮވަން މެދުވެރިވި ސަބަބު ސާފު ނުވާ ކަމަށެވެ. ފުލުހުން ބުނީ އެކަަން ދިމާވީ ހަމަލާއެއްގެ ސަބަބުން ކަމަށް ބެލެވޭނެ ހެއްކެއް ނެތް ކަމަށެވެ.
އާދަޔާ ހިލާފަށް ފިނި ގަދަވުމުގެ ސަބަބުން އެކަން ދިމާވުމަކީ އެކަށީގެންވާ ކަމެއް ކަމަށް ބައެއް ފަރާތްތަކުން ދެކެ އެވެ. މި ދުވަސްވަރު ރޭގަނޑުގެ ވަގުތު ބާލިންގެ ފިނިހޫނުމިން ހުންނަނީ -6 ޑިގްރީ ސެލްސިއަަސްގަ އެވެ.
ރެޑިސަން ބްލޫ ހޮޓަލް ހުންނަ މަގު ބަންދުކުރަން ޖެހުނު.
ބާލިންގެ މޭޔަރު ވިދާޅުވީ ޓޭންކު ގޮވުމުން ސުނާމީއެއްގެ މަންޒަރު އެ ސަރަހައްދުން ސިފަވާ ކަމަށެވެ. އެ ހޮޓަލް ހުންނަ މަގު ބަންދުކުރަން އާއްމު ދަތުރުފަތުރާ ބެހޭ އިދާރާއިން ވަނީ ނިންމައިފި އެވެ.
އަކުއާޑޮމް ހުޅުވީ 2003 ގަ އެވެ. އެއީ ދުނިޔޭގެ އެންމެ ބޮޑު ސިލިންޑަރް ބައްޓަމަށް ހުންނަ ޓޭންކުގެ ރެކޯޑް ހޯދާފައިވާ ތަނެކެވެ. ރިޕޯޓުތައް ބުނާ ގޮތުން އެ ޓޭންކެ ހެދުމަށް 12.8 މިލިއަން ޔޫރޯ ހޭދަވި އެވެ.
