މެލޭޝިއާގެ ސެލަންގޯ ސްޓޭޓުގެ ކޭމްޕް ސައިޓަކަށް ފަސް އެޅި 21 މީހުން މަރުވެއްޖެ އެވެ.
ބަޓަންގް ކާލީ އަވަށުގެ ދަނޑުވެރި ހިސާބެއްގައި ޓެންޓު ޖަހައިގެން އާއިލާތައް ނިދާފައި ތިބި ވަގުތު، ބިންގަނޑު ކަނޑައިގެން ގޮސް ފަސް އެޅުނެވެ.
މެލޭޝިއާގެ ނޫސްތަކުން ބުނީ ގެއްލިފައިވާ 12 މީހުން ހޯދުމަށް ޗަކަ ފަސްގަނޑުގެ ތެރޭގައި 400 އަށް ވުރެ ގިނަ މަސައްކަތްތެރިން އުޅެމުންދާ ކަމަށެވެ.
އޮފިޝަލުން ބުނީ މަރުވި މީހުންގެ ތެރޭގައި ފަސް ކުޑަކުދިންނާއި 12 އަންހެނުން ހިމެނޭ ކަމަށެވެ.
އަލިފާން ނިއްވާ ޓީމުގެ ވެރިޔާ ނޫރްއަޒަމް ހަމިސް މީޑިއާތަކަށް ވިދާޅުވީ މަންމަ އާއި އަންހެން ދަރިއަކު ކަމަށް ބެލެވޭ ދެ މީހުންގެ ހަށިގަނޑު ފެނުނު އިރު ތިބީ ބައްދާލައިގެން ކަމަށެވެ.
ކޭމްޕް ސައިޓުގެ މެނޭޖަރުން ބުނީ އެ ތަނުގައި ރޭ ކުރުމަށް 30 ކުދިންނާއި 51 މީހުން ރަޖިސްޓްރީކޮށްފައި ތިބި ކަމަށެވެ. ހެލްތު މިނިސްޓަރު ޒާލިހާ މުސްތަފާ ވިދާޅުވީ އަނިޔާވި މީހުންގެ ތެރޭގައި މާބަނޑު އަންހެނަކު ވެސް ހިމެނޭ ކަމަށެވެ.
ނިއު ސްޓްރެއިޓްސް ޓައިމްސް ނޫހުން ބުނީ ޕްރައިމެރީ ސްކޫލެއްގެ 20 ޓީޗަރުންނާއި އެ މީހުންގެ އާއިލާތައް އެ ކޭމްޕް ސައިޓުގައި ތިއްބެވެ.
ކަމާ ބެހޭ އިދާރާތަކުން ބުނީ ގާތްގަނޑަކަށް 450،000 އަކަމީޓަރުގެ ވެލި އެ ކޭމްޕް ސައިޓުގެ މައްޗަށް އެޅުނު ކަމަށެވެ. އެ ސައިޓު ހިންގަމުން ދިޔައީ ގަވާއިދާ ހިލާފަށް ކަމަށް ބައެއް ރިޕޯޓުތައް ބުނެ އެވެ.
ދަނޑުގައި އޯގެނިކް ދަނޑުވެރިކަން ކުރުމަށް ހުއްދަ އޮތް ނަމަވެސް، އެ ތަނުގައި ޓެންޓު ޖަހައި ކޭމްޕް ސައިޓެއް ހިންގުމުގެ ހުއްދަ ދޫކޮށްފައެއް ނުވެ އެވެ.
އެކަން ސާބިތުވެއްޖެ ނަމަ، އެ ތަނުގެ ވެރިޔާ ތިން އަހަރަށް ޖަލަށް ހުކުމްކޮށް ނުވަތަ 11،318 ޑޮލަރުން ޖޫރިމަނާ ކުރާނެ އެވެ.
އެ ސަރަހައްދުގެ ލޯކަލް ސަރުކާރުން ބުނީ ފެންގަނޑުތަކާއި ކޯރުތަކާއި އުސް ވެލިގަނޑުތައް ކައިރީގައި "ނުރައްކާތެރި" ކަމަށް ބެލެވޭ ހުރިހާ ކޭމްޕް ސައިޓެއް ހަތް ދުވަހަށް ބަންދު ކުރަން އަންގާފައިވާ ކަމަށެވެ.
ޑެޕިއުޓީ ބޮޑު ވަޒީރު ޒާހިދް ހާމިދީ ފާހަގަކުރެއްވި ގޮތުގައި ކުރިއަށް އޮތް ދުވަސްތަކުގައި މޫސުން ގޯސް ވާނެ ކަމަށް ބެލެވޭތީ އިތުރަށް ފަރުވާތެރިވުން މުހިއްމެވެ.
"މިއަދު މި ހިނގި ހާދިސާއިން އިބުރަތް ހާސިލްކުރަން ޖެހޭ،" އޭނާ ވިދާޅުވި އެވެ.
ސިންގަޕޫރު ފޮރިން މިނިސްޓްރީގެ ތަރުޖަމާނަކު ވިދާޅުވީ ސަލާމަތް ކުރި މީހުންގެ ތެރޭގައި އެ ގައުމުގެ ތިން ރައްޔިތުން ހިމެނޭ ކަމަށެވެ.
ސިންގަޕޫރުގެ ބޮޑު ވަޒީރު ލީ ސިއެން ލޫންގް ވަނީ "ބިންގަނޑު ކަނޑައިގެން ދިޔުމުގެ އަސަރު ކުރި ހުރިހާ ފަރާތްތަކަށް ހިތްވަރު" ދެއްވައިފަ އެވެ.
