ބިލިއަނަރު އެލޮން މަސްކްގެ ޕްރައިވެޓް ޖެޓް ޓްރެކް ކުރަމުން ދިޔަ ޓްވިޓާ އެކައުންޓުގެ ވެރިޔާއާ ދެކޮޅަށް ކޯޓަށް މައްސަލަ ހުށަހަޅަން ނިންމައިފި އެވެ.
"އެލޮން ޖެޓް"ގެ ނަމުގައި ހިންގާ އެކައުންޓަކީ ބައި މިލިއަން މީހުން ފޮލޯކުރާ އެކައުންޓެކެވެ. ބުދަ ދުވަހު ޓްވިޓާއިން އެ އެކައުންޓު ސަސްޕެންޑު ކުރި އެވެ.
އެ އެކައުންޓުގެ ވެރިފަރާތަކީ އުމުރުން 20 އަހަރުގެ ޖެކް ސްވީނީ އެވެ. އޭނާ ވަނީ އާއްމުކޮށް ލިބެން ހުންނަ ފްލައިޓް ޓްރެކިން މައުލޫމާތު ބޭނުންކޮށް، މަސްކްގެ ޖެޓު ދަތުރެއް ކުރާ ކޮންމެ ފަހަރަކު، ޓްވީޓުކޮށްފަ އެވެ.
މަސްކް ބުނީ އަންގާރަ ދުވަހުގެ ރޭ އޭނާގެ ދަރިފުޅު އެކްސް ގޮވައިގެން އެމެރިކާގެ ލޮސް އެންޖެލިސްގައި ދަތުރު ކުރަމުން ދިޔަ ކާރު ފަހަތުން މީހަކު ދުއްވި ކަމަށެވެ.
މަސްކްގެ ދަރިފުޅު އިން ކާރު ހުއްޓުވައި، އެ ކާރުގެ ފުރާޅު މައްޗަށް އެރި ކަމަށް ވެސް އޭނާ ތުހުމަތު ކުރި އެވެ. މަސްކް ބުނީ މީހުންގެ "ރިއަލް ޓައިމް ލޮކޭޝަން" އާއްމު ކުރާ ހުރިހާ އެކައުންޓެއް ސަސްޕެންޑް ކުރާނެ ކަމަށެވެ. އޭނާ ބުނީ މީހުން ތިބޭ ތަންތަން އާއްމު ކުރުމަކީ ފުރާނައަށް ނުރައްކާވެދާނެ ކަމެއް ކަމަށެވެ.
މަސްކްގެ ޖެޓް ޓްރެކް ކުރަމުން ދިޔަ އެކައުންޓުގެ އިތުރުން، އެ އެކައުންޓު ހިންގި ޖެކް ސްވީނީގެ ޕާސަނަލް އެކައުންޓު ވެސް މިހާރު ވަނީ ސަސްޕެންޑްކޮށްފަ އެވެ.
ފްލޮރިޑާއަށް ނިސްބަތްވާ ކޮލެޖް ދަރިވަރު ދަނީ އެމެރިކާގެ ބޮޑެތި މަހުޖަނުންގެ ގިނަ ޕްރައިވެޓް ދަތުރުތައް ޓްރެކް ކުރަމުންނެވެ. އެގޮތުން މައިކްރޯސޮފްޓްގެ ފައުންޑަރު ބިލް ގޭޓްސް، އެމޭޒަންގެ ފައުންޑަރު ޖެފް ބެޒޯސް އަދި މެޓަަގެ ސީއީއޯ މާކް ޒަކަބާގްގެ ޖެޓުތައް ޓްރެކް ކުރާ އެކައުންޓު ވެސް އޭނާ ހިންގަ އެވެ.
އޭގެ ތެރެއިން ގިނަ އެކައުންޓުތައް ބުދަ ދުވަހު ސަސްޕެންޑް ކުރި އެވެ. އެގޮތުން ގިނަ އަދަދެއްގެ ސެލެބްރިޓީންނާއި ރަޝިއާގެ ރައީސް ލެޑިމިއަ ޕުޓިންގެ ޖެޓު ޓްރެކް ކުރާ އެކައުންޓްތައް ސަސްޕެންޑް ކުރި އެވެ.
މީގެ ކުރިން ވެސް މަސްކް ވަނީ "އެލޮން ޖެޓް" ޓްވިޓާ އެކައުންޓް މައްސަލައިގައި ނުރުހުން ފާޅުކޮށްފަ އެވެ. ބައެއް ރިޕޯޓުތައް ބުނާ ގޮތުން އެ އެކައުންޓް ޑިލީޓް ކުރަން އެދި އޭނާ ޖެކް ސްވީނީއަށް 5000 ޑޮލަރު ހުށަހެޅި އެވެ.
ޖެކް ސްވީނީ އެމެރިކާގެ ނޫސްތަކަށް ބުނީ ފައިސާ ދީގެން އެކައުންޓް ހިންގުން ހުއްޓުވުމަކީ ރަނގަޅު ގޮތް ކަމަށް މަސްކަށް ނުފެންނާތީ، ފައިސާގެ ހުށަހެޅުން އަނބުރާ ގެންދިޔަ ކަމަށެވެ.
