ނިއު ދިއްލީ، އިންޑިއާ (ޑިސެމްބަރު 12) - ހިމާލަޔާ ފަރުބަދަތައް ކައިރިން އިންޑިއާ އާއި ޗައިނާ ގުޅޭ ބޯޑަރުގައި މިދިޔަ ހަފުތާގައި ހަމަލާ ބަދަލުކޮށް ސިފައިންނަށް އަނިޔާވެއްޖެ އެވެ.
އެ ހާދިސާ ހިނގީ ޑިސެމްބަރު ނުވަ ވަނަ ދުވަހު އެވެ. ހާދިސާގެ މައުލޫމާތު އެނގޭ ފަރާތަކުން އޭއެފްޕީއަށް ބުނީ ދެ ގައުމުން ވެސް ސިފައިންނަށް އަނިޔާވި ކަމަށެވެ.
އިންޑިއާގެ މަސްދަރަކުން ބުނީ އެ ގައުމުގެ ސިފައިންގެ ހަ މީހުންނަށް އަނިޔާވި ކަމަށެވެ. ޗައިނާއިން އެއްވެސް އެއްޗެއް ބުނެފައެއް ނުވެ އެވެ.
އިންޑިއާގެ މަސްދަރުން ބުނީ ހަމަލާ ބަދަލު ކުރީ ޗައިނާ ސިފައިން އެއްބަސްވުމާ ހިލާފުވުމުން ކަމަށެވެ. އެގޮތުން "ލައިން އޮފް އެކްޗުއަލް ކޮންޓްރޯލް" ކައިރިއަށް ދެ ގައުމުން ވެސް ނުދިޔުމަށް އެއްބަސްވެފައި އޮއްވައި ޗައިނާ ސިފައިން އެ ތަނާ ކައިރިވި ކަމަށް ބުންޏެވެ.
އެންމެ ފުރަތަމަ ހަމަލާ ދިނީ އިންޑިއާ ސިފައިންނެވެ. ރައްދުގައި ޗައިނާއިން ވެސް ހަމަލާ ދިނުމަށް ފަހު، ދެ ގައުމުގެ ސިފައިން ވެސް އެ ތަނުން ދިޔަ އެވެ.
އޭގެ ފަހުން އިންޑިއާގެ ކޮމާންޑަރަކު ވަނީ ޗައިނާގެ އަސްކަރީ ވެރިޔަކާ ބައްދަލުކުރައްވައި، ސުލްހަ ދެމެހެއްޓޭނެ ގޮތްތަކާ ބެހޭ ގޮތުން މަޝްވަރާ ކުރައްވައިފަ އެވެ.
އެ ހާދިސާ ހިނގީ އިންޑިއާގެ އިރުއުތުރު އަރޫނަޗަލް ޕްރަދޭޝް ސްޓޭޓްގެ ޓަވާންގް ސެކްޓަރުގަ އެވެ. ޗައިނާއިން އެ ސަރަހައްދަށް ކިޔަނީ ދެކުނު ޓިބެޓް އެވެ. ޗައިނާ އިން ދެކެނީ އެއީ އެ ގައުމުގެ ބިމެއް ކަމަށެވެ.
ޗައިނާ އާއި އިންޑިއާ ގުޅޭ ބޯޑަރު ކައިރީގައި ދޭތެރެ ދޭތެރެއިން ކުރިމަތިލުންތައް ހިނގަ އެވެ. އެ ދެ ގައުމުން 1962 ގައި ހަނގުރާމަ ވެސް ކުރި އެވެ.
