ދޯހާ (ޑިސެމްބަރު 12) - ވޯލްޑް ކަޕްގެ ކުއާޓާ ފައިނަލުން ޕޯޗުގަލް ކެޓި ފަހުން ފުރަތަމަ ފަހަރަށް އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ރޭ އާންމުކޮށް މެސެޖެއް ދީފައިވާއިރު، ގައުމީ ޓީމުގެ ކެރިއަރު ކުރިއަށް ގެންދިއުމާ މެދު ރޮނާލްޑޯ ވަކި އެއްޗެއް ނުބުނެ އެވެ.
ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގެ ކުއާޓާ ފައިނަލްގައި މޮރޮކޯ އަތުން 1-0 އިން ބަލިވެ ޕޯޗުގަލް ވަނީ ބަލިވެފައެވެ. ކުއާޓާ ފައިނަލް މެޗާއި ގަަދަ 16ގައި ޕޯޗުގަލް ކުޅުނު މެޗުގައި އެ ޓީމުގެ ކޯޗު ފެނާންޑޯ ސަންޓޯސް ރޮނާލްޑޯ އަށް ފުރަތަމަ 11 އިން ޖާގައެއް ނުދެ އެވެ. މި ދެ މެޗުގައި ވެސް ރޮނާލްޑޯ ނުކުތީ ބަދަލު ކުޅުންތެރިއެއްގެ ގޮތުގަ އެެވެ. ޖެހިޖެހިގެން ދެ މެޗުގައި ރޮނާލްޑޯ ބަދަލު ކުޅުންތެރިއެއްގެ ގޮތުގައި ބެހެއްޓުމަކީ ކޯޗު ސަންޓޯސް ހެދި ގޯހެއްގެ ގޮތުގައި ޕޯޗުގަލްގެ ކުރީގެ ކެޕްޓަން، ލުއިސް ފިގޯ ވަނީ ބުނެފަ އެވެ.
މޮރޮކޯ އަތުން ބަލިވި މެޗަށް ފަހު، ރޮނާލްޑޯ ދަނޑުން ފައިބައިގެން ޓަނަލްއާ ދިމާލަށް ދިޔައިރު، އޭނާގެ ލޮލުން ކަރުނަ އޮހުރުނު މަންޒަރު ފެނުނެވެ.
މިއީ ރޮނާލްޑޯ ،37، ގެ ފަސް ވަނަ ވޯލްޑް ކަޕް އެވެ. އަދި މިއީ އޭނާގެ ފަހު ވޯލްޑް ކަޕަށް ކުރިން ވެސް ބެލިވައިވާއިރު، ރޮނާލްޑޯގެ ވާހަކައިން ވެސް އެކަން ކަށަވަރުވެ އެވެ. އެކަމަކު، ގައުމީ ޓީމުގެ ކެރިއަރު ކުރިއަށް ގެންދިއުމާ މެދު ވަކި އެއްޗެއް އޭނާ ނުބުނެ އެވެ.
"ޕޯޗުގަލްގެ ޓީމާއެކު ވޯލްޑް ކަޕް ކާމިޔާބުކުރުމަކީ އަހަރެންގެ ކެރިއަރުގެ އެންމެ ބޮޑު އަދި އެންމެ އުންމީދުކުރި ކާމިޔާބު. އެކަމަކު އެ ހުވަފެން ހަގީގަތަކަށްނުވި،" ރޮނާލްޑޯ އިންސްޓަގްރާމަށް ދޫކޮށްލި އަސަރުގަދަ މެސެޖުގައި ބުނެފައިވެއެވެ.
ރޮނާލްޑޯ ބުނީ ވޯލްޑް ކަޕްގެ ތެރެއިން އޭނާ އަށް ގިނަ ފާޑުކިއުންތައް އަމާުޒުވި ނަމަވެސް، ޕޯޗުގަލްގެ ޓީމަށް އޭނާ ދޭ އަހައްމިއްޔަތުކަމާމެދު ސުވާލު އުފެއްދޭނެ ޖާގައެއް ނޯންނާނެ ކަމަށެވެ. އަދި މިއީ "ޖަޒުބާތުގައި ޖެހިގެން" ރައްދު ދޭންވީ ވަގުތެއް ނޫން ކަމަށެވެ.
"ވަރަށް ގިނަ ވާހަކަތަކެއް ލިޔެފި، ވަރަށް ގިނަ ވާހަކަތަކެއް ދައްކައިފި އަދި ވަރަށް ގިނަ އަޑުތަކެއް ފެތުރިއްޖެ. އެކަމަކު ޕޯޗުގަލްގެ ޓީމަށް އަހަރެން ދޭ އަހަމިއްޔަތުކަމާމެދު ސުުވާލު އުފެއްދޭނެ ފުރުސަތެއް ނޯންނާނެ،" ރޮނާލްޑޯ ބުންޏެވެ.
"ދަނޑުމަތީގައި އަހަންނަށް ދެވެން އޮތް ހުރިހާ އެއްޗެއް އަހަރެން ދިނިން. އަަހަރެންގެ ހުވަފެންތައް ހާސިލްކުރުމަށް ކުރެވެން އޮތް ހުރިހާ މަސައްކަތެއް ކުރިން."
ރޮނާލްޑޯ އަށް ފުރަތަމަ 11 އިން ޖާގަ ގެއްލުމާ އެކު، މުބާރާތުގެ ތެރެއިން ޕޯޗުގަލް ޓީމު ދޫކޮށް ދިއުމަށް އޭނާ އެދުނު ކަމަށް މީޑިއާ ރިޕޯޓްތަކުން ބުންޏެވެ. އެކަމަކު، ޕޯޗުގަލްގެ ކޯޗު ސަންޓޯސް ވަނީ އެ ވާހަކަތައް ދޮގުކޮށްފައެވެ.
ޕޯޗުގަލްގެ ގައުމީ ޓީމަށް 118 ގޯލު ޖަހައިގެން، ފިރިހެނުންގެ ފުޓްބޯޅައިގައި ގައުމީ ޓީމަކަށް އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް އޮތީ ރޮނާލްޑޯ އަތުގަ އެވެ. އެންމެ ފަހުން މޮރޮކޯއާ ދެކޮޅަށް ކުޅުނު މެޗުގައި ރޮނާލްޑޯ ވަނީ ޕޯޗުގަލް ޓީމަށް 196 ވަނަ މެޗު ކުޅެދީ، ގައުމީ ޓީމަށް އެންމެ ގިނަ މެޗު ކުޅެދިނުމުގެ ރެކޯޑް ހަދާފައިވާ ކުވޭތުގެ ބަދުރު އަލް-މުތާވާގެ ރެކޯޑާ ހަމަކޮށްފަ އެވެ.
