ބެއިޖިން، ޗައިނާ (ޑިސެމްބަރު 11) - ކޮވިޑް ކޮންޓްރޯލް ކުރަން އަޅާފައި ހުރި ފިޔަވަޅުތަކަށް ލުއިދޭން ފެށުމުން ކުއްލިއަކަށް ކޭސްތައް އިތުރުވާން ފަށާފައިވާ ކަމަށް ޗައިނާގެ އިސް ސިއްހީ ތަޖުރިބާކާރުން ބުނެފި އެވެ.
ކޭސްތައް އިތުރުވަމުންދާ ކަމަށް ބެލެވޭތީ ވެރިރަށް ބެއިޖިންގެ ފިހާރަތަކާއި ރެސްޓޯރެންޓްތައް މިހާރު ހުންނަނީ ފަޅުކޮށެވެ.
ޗައިނާގެ އެންމެ އިސް އެޕިޑެމިއޮލޮޖިސްޓް ޒޯންގް ނަންޝާން ދައުލަތުގެ މީޑިއާއަށް ވިދާޅުވީ ކޮވިޑް ވައިރަހުގެ އޮމިކްރޯން ވޭރިއެންޓް އެ ގައުމުގައި ވަރަށް ބޮޑަށް ފެތުރިފައިވާ ކަމަށެވެ.
"މިހާރު ފެތުރެމުންދާ އޮމިކްރޯންގެ މިޔުޓޭޝަން ވަރަށް އަވަހަށް ފެތުރޭ. އެކެއްގެ ގައިން 22 މީހުންގެ ގަޔަށް ވައިރަސް އެރުމުގެ ފުރުސަތު އޮވޭ،" އޭނާ ވިދާޅުވި އެވެ.
ޗައިނާގެ "ޒީރޯ ކޮވިޑް" ސިޔާސަތު މެދުކަނޑާލައި ފިޔަވަޅުތަކަށް ލުއިދޭން ފެށީ އާއްމުން ހިތްހަމަނުޖެހި މުޒާހަރާ ކުރަން ފެށުމުންނެވެ.
އެހެން ނަމަވެސް ލުއިތައް ދިން އިރު، ކޭސްތައް އިތުރުވެދާނެ ކަމަށް ތައްޔާރުވެފައެއް ނުވެ އެވެ. އާބާދީގައި ހިމެނޭ އެތައް މިލިއަން އުމުރުން ދުވަސްވީ މީހުން ވެކްސިން ފުރިހަމައެއް ނުކުރެ އެވެ.
ނޭޝަނަލް ހެލްތު ކޮމިޝަންގެ ޑިޕާޓްމަންޓް އޮފް މެޑިކަލް އެފެއާޒްގެ ޑިރެކްޓަރު ޖިއާއޯ ޔާހުއި ވިދާޅުވި ޗައިނާގެ ކޮންމެ 10،000 މީހަކަށް ހުރީ އައިސީޔޫގެ އެއް އެނދު ކަމަށެވެ.
އޭނާ ވިދާޅުވީ 106،000 ޑޮކްޓަރުންނާއި 177،700 ނަރުހުންގެ މަސައްކަތް ދެން ބަދަލު ކުރާނީ ކޮވިޑްގައި އައިސީޔޫގައި ތިބޭ މީހުންނަށް ފަރުވާ ދިނުމަށް ކަމަށެވެ.
