ބްރަސެލްސް، ބެލްޖިއަމް (ޑިސެމްބަރު 10) - ޔޫރޮޕިއަން ޕާލަމެންޓުގެ ނައިބު ރައީސްކަން ކުރައްވާ ގްރީސްގެ ސޯޝަލިސްޓް އެމްޕީ އީވާ ކައިލީ ހުކުރު ދުވަހު ބެލްޖިއަމްގެ ފުލުހުން ހައްޔަރުކޮށްފި އެވެ.
އޭނާ ހައްޔަރު ކުރީ ފީފާ ވޯލްޑް ކަޕް ކުރިއަށްދާ ގަތަރާ ގުޅުން ހުރި ކޮރަޕްޝަން މައްސަލައެއްގަ އެވެ. އޭނާގެ އިތުރުން ވެސް ހުކުރު ދުވަހު އެ މައްސަލައިގައި ހަތަރު މީހުން ހައްޔަރު ކުރި އެވެ.
ހުކުރު ދުވަހު ހައްޔަރު ކުރި ހަތަރު މީހުންގެ ތެރޭގައި ކައިލީގެ ބައިވެރިޔާ ވެސް ހިމެނެ އެވެ. އެ މީހުން ހައްޔަރު ކުރީ ތަހުގީގުގެ ބޭނުމަށް ސުވާލު ކުރުމަށެވެ.
ބެލްޖިއަމްގެ ވެރިރަށް ބްރަސެލްސްގެ 16 ތަނެއް ފުލުހުން ބަލައި ފާސްކުރި އިރު، 600،000 ޔޫރޯ ނަގުދު ފައިސާގެ ގޮތުގައި ފެނުނެވެ. މީހުން ހައްޔަރު ކުރިކަން އިއުލާން ކުރީ އެ ފައިސާތައް ފެނުނު ފަހުންނެވެ.
އެ މައްސަލައިގައި ހިމެނޭ މީހުން ވަނަވަރާއި ކޮރަޕްޝަންގެ ތުހުމަތުގައި ހިމެނޭ ގައުމުގެ ނަން ވެސް ބެލްޖިއަމްގެ އިދާރާތަކުން ރަސްމީކޮށް ހާމައެއް ނުކުރެ އެވެ. އެހެން ނަމަވެސް އެއީ ގަލްފުގެ ގައުމެއް ކަމަށޤ ބުންޏެވެ.
އެކަމުގެ މައުލޫމާތު އޭއެފްޕީއާ ހިއްސާކުރި މަސްދަރަކުން ބުނީ އެއީ 2004 އިން 2019 އަށް އިޓަލީގެ ސޯޝަލިސްޓް އެމްޕީއަކަށް ރިޝްވަތު ދޭން ގަތަރުން ކުރި މަސައްކަތާ ގުޅުން ހުރި މައްސަލައެއް ކަމަށެވެ.
