ނިމިގެންދިޔަ ނޮވެމްބަރު މަހު އާމްދަނީ ގޮތުގައި 1.51 ބިލިއަން ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހާމަކޮށްފި އެވެ.
މިއީ މިދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 20.4 އިންސައްތައިގެ ކުރިއެރުމެކެވެ. އަދި, މި އަހަރުގެ މި މުއްދަތުގައި ލިބޭނެ ކަމަށް އެ އޮތޯރިޓީން އަންދާޒާ ކުރި އަދަދަށް ވުރެ 43.7 އިންސައްތަ އިތުރު އަދަދެކެވެ.
މީރާއިން ބުނީ މިދިޔަ އަހަރުގެ ނޮވެމްބަރުގައި ލިބުނު އާމްދަނީއަށް ވުރެ ފާއިތުވި މަހުގެ އާމްދަނީ އިތުރުވެފައިވަނީ ޖީއެސްޓީ، އިންކަމް ޓެކްސް، ޓޫރިޒަމް ލޭންޑް ރެންޓް، އެއަރޕޯޓް ޑިވެލޮޕްމަންޓް ފީ އަދި އެއާޕޯޓު ސާވިސް ޗާޖުގެ ގޮތުގައި ލިބިފައިވާ އާމްދަނީ އިތުރު ވެފައި ވާތީ ކަމަށެވެ.
މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދަށްވުރެ ނިމުނު މަހު ޒިޔާރަތްކުރި ފަތުރުވެރިންގެ އަދަދު 2.5 އިންސައްތަ މަދުވި ނަމަވެސް ކުރީ އަހަރަށްވުރެ މީރާއަށް ލިބުނު އާމްދަނީ އިތުރުވެފައިވަނީ އެއާޕޯޓު ޓެކުހާއި ފީގެ ރޭޓަށް އައި ބަދަލުގެ ސަބަބުން ކަމަށް އެ އޮތޯރިޓީން ބުނެ އެވެ. އެއާޕޯޓު ޑެވެލޮޕްމަންޓު ފީ އަދި އެއާޕޯޓު ސާވިސް ޗާޖުގެ ގޮތުގައި އޮކްޓޫބަރު މަހު މީރާއަށް 132.65 މިލިއަން ރުފިޔާ ލިބުނެވެ.
އެ އޮތޯރިޓީން އިއްޔެ އާއްމުކުރި ތަފާސް ހިސާބުތަކަށް ބަލާއިރު، ނޮވެމްބަރު މަހު ރެވެނިއުގެ ގޮތުގައި މީރާއަށް ލިބުނު އާމްދަނީގެ އެންމެ ބޮޑު ބައެއް ހިއްސާ ކުރަނީ ޖީއެސްޓީ އެވެ. އެއީ އެ މަހު ލިބުނު ޖުމްލަ އާމްދަނީގެ 52.3 އިންސައްތަ އެވެ. ދެވަނައަށް އެއްމެ ބޮޑު އާމްދަނީއެއް ލިބިފައިވަނީ ލީސް ޕީރިއަޑް އެކްސްޓެންޝަން ފީގެ ގޮތުގަ އެވެ. އެގޮތުން، އެކްސްޓެންޝަން ފީގެ ގޮތުގައި 230 މިލިއަން ރުފިޔާ ބަލައިގެންފައިވެ އެވެ.
ނޮވެމްބަރު މަހު މީރާއިން ބަލައިގަނެފައިވާ އާމްދަނީގެ ތެރޭގައި 63.6 މިލިއަން އެމެރިކާ ޑޮލަރު ހިމެނޭ ކަމަށް އެ އޮތޯރިޓީން އާއްމުކުރި ރިޕޯޓުގައި ވެއެވެ.
ނޮވެމްބަރުގައި މީރާއަށް ލިބުނު އާމްދަނީ އިތުރުވެފައިވާ އިރު މި އަންނަ އަހަރުގެ ޖެނުއަރީން ފެށިގެން ޖީއެސްޓީއާއި ޓީޖީއެސްޓީގެ ގޮތުގައި ނަގާ މިންވަރު ބޮޑުކުރާނެ އެވެ.
އެގޮތުން، ޖީއެސްޓީ އަށް އިންސައްތައަށް އަދި ޓީޖީއެސްޓީ 16 އިންސައްތައަށް ބޮޑު ކުާ ގޮތަށް ގާނޫނަށް އިސްލާހު ވަނީ ގެނެސްފަ އެވެ. މިހާރު ހަ ޕަސެންޓުގައި ނަގަމުންދާ ޖީއެސްޓީ އަށް ޕަސެންޓަށް ބޮޑުކޮށްފި ނަމަ މުދަލާއި ހިދުމަތުގެ އަގު 2.5 ޕަސެންޓުން އުފުލޭނެ ކަމަށް ފިނޭންސް މިނިސްޓަރީން ލަފާ ކުރެ އެވެ.
