ވަރަށް މަދުން ނޫނީ ނުފެންނަ ނިޔުރޮލޮޖިކަލް ސިއްހީ މައްސަލައެއް ކަމުގައިވާ "ސްޓިފް ޕާސަން ސިންޑްރޯމް" (އެސްޕީއެސް) ލަވަކިޔުންތެރިޔާ ސެލިން ޑިއޯންއަށް ކުރިމަތިވެއްޖެ އެވެ.
ފްރާންސާއި ކެނެޑާއަށް ނިސްބަތްވާ ލަވކިޔުންތެރިޔާ އެކަން ހާމަކުރީ އޭނާގެ 5.2 މިލިއަން ފޮލޯވަރުންނަށް އިންސްޓަގްރާމްގައި ފޮނުވި މެސެޖެއްގަ އެވެ.
އެ މައްސަލައިގެ ސަބަބުން މޫނަށް އަސަރުކޮށް، ހިނގުމާއި، ލަވަކިޔުމަށް ވެސް އުނދަގޫވާ ކަމަށް އޭނާ ބުންޏެވެ. އެހެންކަމުން އަންނަަ އަހަރަށް ރޭވި ޝޯތައް ކެންސަލް ކުރާނެ ކަމަށް ބުންޏެވެ.
"ސިއްހަތާ ގުޅުން ހުރި މައްސަލަތައް ކުރިމަތިވާތާ ވަރަށް ދުވަސްވެއްޖެ،" އުމުރުން 54 އަހަރުގެ ސެލިން ޑިއޯން ބުންޏެވެ.
އެސްޕީއެސްއަކީ ކޮންމެ މިލިއަން މީހެއްގެ ތެރެއިން އެކަކަށް ކުރިމަތިވާ މައްސަލައެކެވެ. އެ ކޮންޑިޝަންއާ ގުޅޭ މާ ބޮޑު އެއްޗެއް ސައިންސްވެރިންނަަށް ހޯދިފައެއް ނުވެ އެވެ.
ނޭޝަނަލް އިންސްޓިޓިއުޓް ފޯ ނިޔުރޮލޮޖިކަލް ޑިސްއޯޑާޒްއިން ބުނީ އެއީ ލޯ ތޮޅޭ ގޮތަށް މޫނުގެ މަސްތައް މާ ބޮޑަށް ތޮޅެން ދިމާވާ ހާލަތެއް ކަމަށެވެ. އެކަން ބޮޑަށް ދިމާވަނީ އަލިގަދަވެ، ކުއްލިއަކަށް އަޑެއް އިވުން ކަހަލަ ކަންކަން ވުމުންނެވެ.
"އެސްޕީއެސް ކުރިމަތިވާ ގިނަ މީހުން ވަރަށް ގިނައިން ވެއްޓެން މެދުވެރިވޭ. އެއީ އާދައިގެ މީހެއްގެ ހުންނަ ޑިފެންސިވް ރިފްލެކްސްތައް ހަށިގަނޑަށް ނުގެނެވޭތީ."
އެކަމަށް ވަކި ފަރުވާއެއް ނެތް އިރު، އަލާމާތްތައް ކުޑަކުރަަން އެންޒައިޓީއާ ދުރުކުރާ ބޭހާއި މަސްތައް ރިލެކްސް ކުރުވާ ބޭސްތައް ދެ އެވެ.
