އަހްމަދުއާބާދް، އިންޑިއާ (ޑިސެމްބަރު 8) - އިންޑިއާގެ ބޮޑު ވަޒީރު ނަރެންދްރަ މޯދީ ނިސްބަތްވެވަޑައިގަންނަވާ ގުޖަރާތު ސްޓޭޓުގެ ޕާލަމެންޓު އިންތިހާބުގައި އެމަނިކުފާނުގެ ޕާޓީއަށް ތާރީހީ ކާމިޔާބެއް ލިބިއްޖެ އެވެ.
އިންޑިއާގެ ހުޅަނގުގައި އޮންނަ ގުޖަރާތުން ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) މި ފަހަރު ހޯދީ މީގެ ކުރިން ނުހޯދާ ވަރުގެ ބޮޑު ކާމިޔާބެކެވެ. އެގޮތުން 60 މިލިއަން މީހުންގެ އާބާދީއެއް އޮންނަ ސްޓޭޓުގެ ޕާލަމެންޓުގެ 182 ގޮނޑީގެ ތެރެއިން 147 ގޮނޑި ކަށަވަރު ކުރީ ބީޖޭޕީއިންނެވެ. ބެލެވޭ ގޮތުގައި ދާއިމީ ނަތީޖާ އިއުލާން ކުރާ އިރު، އިތުރު ނުވަ ގޮނޑި އެ ޕާޓީއަށް ލިބޭނެ އެވެ.
ގުޖަރާތުގެ ކެމްޕެއިންގައި މޯދީ ވަރަށް ބުރަކޮށް މަސައްކަތް ކުރެއްވި އެވެ. އެމަނިކުފާނު ވަނީ މީގެ 12 އަހަރު ކުރިން އެ ސްޓޭޓުގެ ޗީފް މިނިސްޓަރުކަން ކުރައްވައިފަ އެވެ. އިންތިހާބުގެ ނަތީޖާއަށް ފަހު މޯދީ ކުރެއްވި ޓްވީޓެއްގައި ގުޖަރާތުގެ ރައްޔިތުންނަށް ޝުކުރު އަދާކުރެއްވި އެވެ.
ގުޖަރާތުގެ ޗީފް މިނިސްޓަރުކަމުގައި މޯދީ ހުންނެވި އިރު، 2002 ވަނަ އަހަރު އެ ސްޓޭޓްގައި ހިންދޫންނާއި މުސްލިމުންނާ ދެމެދު ހަމަނުޖެހުން ބޮޑުވި އެވެ. އެ ހަމަނުޖެހުންތަކުގައި ހާހަކަށް ވުރެ ގިނަ މީހުން މަރުވި އިރު، ގިނައިން ހިމެނެނީ މުސްލިމުންނެވެ.
އިދިކޮޅު ކޮންގްރެސް ޕާޓީއަށް ގުޖަރާތުގެ ޕާލަމެންޓުން ލިބުނީ އެންމެ 16 ގޮނޑި އެވެ. އެއީ އެ ސްޓޭޓުގައި ކޮންގްރެސްއިން ހޯދި އެންމެ ދަށް ނަތީޖާ އެވެ.
އެ ސްޓޭޓުގައި ދެން ބީޖޭޕީއާ ވާދަަކުރީ ވެރިރަށް ނިއު ދިއްލީ އާއި ޕަންޖާބް ކޮންޓްރޯލް ކުރާ އާއްމު އާދްމީ ޕާޓީ (އޭއޭޕީ) އިންނެވެ. އެކަމަކު އެ ޕާޓީއަށް ވެސް ލިބުނީ އެންމެ ފަސް ގޮނޑި އެވެ.
ބީޖޭޕީއިން މެދުކެނޑުމެއް ނެތި ގުޖަރާތުގައި ވެރިކަން ކުރާތާ 27 އަހަރު ވެއްޖެ އެވެ. އިންޑިއާގެ 28 ސްޓޭޓުގެ ތެރެއިން 16 ސްޓޭޓުގައި ޗީފް މިނިސްޓަރުންނަށް ތިއްބެވީ ބީޖޭޕީއާ ގާތް ފަރާތްތަކެވެ.
އިންޑިއާގައި އާ ބޮޑު ވަޒީރަކު ހޮވަން ހުރިހާ ސްޓޭޓްތަކުން ބައިވެރިވާ ގައުމީ އިންތިހާބު އޮންނާނީ 2024 ގަ އެވެ. ބެލެވޭ ގޮތުގައި އުމުރުފުޅުން 72 އަހަރުގެ މޯދީ ތިން ވަނަ ދައުރަކަށް ކުރިމަތިލައްވާނެ އެވެ.
