ބެއިޖިން، ޗައިނާ (ޑިސެމްބަރު 8) - ޗައިނާގައި ގެންގުޅޭ ޒިރޯ ކޮވިޑް ސިޔާސަތަށް ކުއްލި ބަދަލުތަކެއް ގެނެސް، ބޮޑެތި ލުއިތަކެއް ދޭން ނިންމައިފި އެވެ.
ބެއިޖިން ނެޝަނަލް ހެލްތު ކޮމިޝަން (އެންއެޗްސީ) އިން ބުދަ ދުވަހު ބުނީ ޓެސްޓު ކުރުން މަޖުބޫރުވާ ހާލަތްތައް މަދުކޮށް، ޕޮޒިޓިވްވާ ބައެއް މީހުން ގޭގައި ކަރަންޓީނުކޮށް، ބޮޑެތި ސަރަހައްދުތައް ލޮކްޑައުން ކުރުން ހުއްޓާލާނެ ކަމަށެވެ.
އެންއެޗްސީއިން ބުނީ ސިޔާސަތަަށް ބޮޑެތި ބަދަލުތަކެއް ގެންނަން ނިންމީ "ބަދަލުވަމުންދާ ހާލަތާ އެއް ގޮތަށް އަމަލު ކުރުމަށް" ކަމަށެވެ. އެހެން ގައުމުތަކުން ކޮވިޑް ފިޔަވަޅުތައް އުވާލައި އާއްމު ހާލަތަށް ރުޖޫއަވެފައިވާ އިރު، ޗައިނާއިން މިއަދާ ހަމައަށް ވެސް ދިޔައީ ހަރުކަށި ފިޔަވަޅުތައް ތަންފީޒު ކުރަމުންނެވެ.
ވެރިރަށް ބެއިޖިންގައި ވެސް ގިނަ ބަޔަކު ގެއިން ނުނިކުމެ، ވިޔަފާރިތައް ބަންދުކޮށް އެތައް ދުވަހެއް ތިބެން ޖެހުނެވެ. އެހެން ނަމަވެސް ބުރާސްފަތި ދުވަހު، ގިނަ ބަޔަކު ބޭރުގައި އުޅެމުން ދިޔަ އެވެ.
ޓެސްޓު ކުރުމުގައި ލުއިތައް ދިން ނަމަވެސް، އަދިވެސް ގިނަ ވަޒީފާތަކުގައި އުޅޭ މީހުން އޮފީހަށް ނިކުތުމަށް ނެގެޓިވް ޕީސީއާރް ނަތީޖާ ބޭނުންވެ އެވެ.
ޗައިނާއިން މިހާރު ތައްޔާރުވަމުން ދަނީ ލުއިތަކާ އެކު ކޭސްތައް އިތުރުވާނެ ކަމަށެވެ. ކަމާ ބެހޭ ބައެއް އޮފިޝަލުން ލަފާކުރާ ގޮތުގައި ކޭސްތައް އިތުރުވެ، މިލިއަަނެއްހާ މީހުން މަރުވުން އެކަށީގެންވެ އެވެ.
