ހުކުރު ދުވަހު ބޭއްވުމަށް ހަމަޖެހިފައި އޮތް ޓެންޒޭނިއާގެ މިނިވަން ދުވަހުގެ އިހްތިފާލްތައް ކެންސަލްކޮށް، އެ ފައިސާ ކުޑަކުދިންނަށް ހޭދަކުރަން ރައީސް ސާމިއާ ސުލޫހޫ ހަސަން ނިންމަވައިފި އެވެ.
އެކަމަނާ ނިންމެވީ ހާއްސަ އެހީއަށް ބޭނުންވާ ކުދިން ދިރިއުޅޭނެ އިމާރާތްތައް އެޅުމަށް އެ ފައިސާ ހޭދަކުރުމަށެވެ. ޓެންޒޭނިއާގެ 61 ވަނަ މިނިވަން ދުވަހުގެ އިހްތިފާލްތަކަށް 445،000 ޑޮލަރު ކަނޑައެޅި އެވެ.
އެ އިހްތިފާލްތައް ކެންސަލް ކުރުމުން، ފައިސާ ދެން ބޭނުން ކުރާނީ ޓެންޒޭނިއާގެ އެކި ހިސާބުތަކުގައި ޕްރައިމަރީ ސްކޫލްތަކުގައި ކުދިން ތިބުމަށް ހާއްސަ އަށް އިމާރާތް އެޅުމަށެވެ.
އެ ގައުމުގެ ސްޓޭޓް މިނިސްޓަރު ޖޯޖް ސިމްބަޗަވެނޭ ވިދާޅުވީ ފައިސާ މިހާރު އެ ޕްރޮޖެކްޓުތަކަށް ހަވާލުކޮށްފައިވާ ކަމަށާއި އިހްތިފާލްތަކުގެ ބަދަލުގައި މިނިވަން ދުވަސް ފާހަގަކުރާނީ ތަރައްގީއާ ގުޅޭ ގޮތުން އާއްމުންގެ މަޝްވަރާތައް ބާއްވައިގެން ކަމަށެވެ.
އާއްމުކޮށް މިނިވަން ދުވަހުގެ އިހްތިފާލްތަކުގައި ބޮޑެތި ޖަލްސާތަކާއި ކުޅިވަރުތަކާއި ކެއުންތައް އޮވެ އެވެ. އެހެން ނަމަވެސް މީގެ ކުރިން ވެސް ޓެންޒޭނިއާއިން މިނިވަން ދުވަހުގެ އިހްތިފާލްތައް ކެންސަލްކޮށްފައިވެ އެވެ.
އެގޮތުން 2015 ވަނަ އަހަރު އޭރުގެ ރައީސް ޖޯން މަގުފުލީ ނިންމެވީ އިހްތިފާލްތައް ކެންސަލްކޮށް، ވެރިރަށް ދާރުއްސަލާމްގައި މަގެއް އެޅުމަށް އެ ފައިސާ ބޭނުން ކުރުމަށެވެ. އޭގެ ފަހުން 2020 ވަނަ އަހަރު އިހްތިފާލްތަކުގެ ބަދަލުގައި ފައިސާ ހޭދަކުރީ ސިއްހީ ސާމަނު ހޯދުމަށެވެ.
މިހާރު ވެރިކަމުގައި ހުންނެވި ސާމިއާއަކީ ޓެންޒޭނިއާގެ އެންމެ ފުރަތަމަ އަންހެން ރައީސެވެ. މީގެ ކުރިން އެކަމަނާ ވަނީ މާ ބޮޑަށް ބަނޑުލައި، ފަލަކޮށް ތިބޭ ފުލުހުން ބަރުދަން ލުއި ކުރުމަށް އަމުރު ކުރައްވައިފަ އެވެ. އެއީ މާ ބޮޑަށް ފަލަވުމުން މަސައްކަތަށް ހުރަސް އެޅޭތީ އެވެ.
