ރާއްޖޭގައި އިތުރު ހަރަކާތް ހިންގުމުގެ ގޮތުން އަންނަ އަހަރު ޑްރޯން ބޭނުންކުރަން ހުއްދަ ދޭން ނިންމާފައިވާ ކަމަށް ޓްރާންސްޕޯޓް މިނިސްޓަރު އާއިޝަތު ނަހުލާ ވިދާޅުވެއްޖެ އެވެ.
ނަހުލާ މިހެން ވިދާޅުވީ، ބައިނަލްއަގުވާމީ ވައިގެ ދަތުރުފަތުރުގެ ދުވަހާއި ގުޅޭގޮތުން ދެެއްވި ހިތާބެއްގަ އެވެ.
ބައިނަލްއަގުވާމީ މަދަނީ ދަތުރުފަތުރުގެ ދުވަހުގެ މުނާސަބަތުގައި ނަހުލާ ވަނީ ރާއްޖޭގައި މަދަނީ ވައިގެ ދަތުރުފަތުރުގެ ސިނާއަތް ތަރައްގީކުރުމަށް ކުރައްވަމުން ގެންދަވާ މަސައްކަތްތަކާ ގުޅޭގޮތުން ވާހަކަ ދައްކަވާފަ އެވެ.
އެގޮތުން އޭވިއޭޝަން ދާއިރާގެ ތަރައްގީ އާއި ތިމާވެށި ދެމެހެއްޓެނިވި ގޮތެއްގައި ހަރަކާތްތައް ކުރިއަށް ގެންދިއުމަކީ ކުރީއްސުރެ ސަރުކާރުން ގެންގުޅުއްވާ ސިޔާސަތެއްކަން ފާހަގަކުރެއްވި އެވެ.
ނަހުލާ ވިދާޅުވީ، މިހާރު މަސައްކަތް ކުރައްވަމުން ގެންދަވަނީ ރާއްޖޭގައި އިތުރު ހަރަކާތްތައް ހިންގުމުގެ ފުރުސަތު ތަނަވަސްކޮށްދިނުމުގެ ގޮތުން ޑްރޯން އޮޕަރޭތް ކުރުމުގެ ހުއްދަ ދިނުމަށް ނިންމާފަ އެވެ.
"ދިވެހިރާއްޖޭގައި ޑްރޯން މެދުވެރިކޮށް ތަފާތު ހިދުމަތްތައް ފޯރުކޮށްދިނުމަށް އަންނަ އަހަރު އިރާދަކުރެއްވިއްޔާ ހުއްދަ ދޭން ފަށާނެ." ނަހުލާ ވިދާޅުވި އެވެ.
މަދަނީ ވައިގެ ދަތުރުފަތުރުގެ ސިނާއަތް ތަރައްގީކޮށް ކުރިއެރުވުމުގެ މަސައްކަތް އެންމެ އެދެވޭ ގޮތެއްގައި ކުރެވޭނީ ސިވިލް އޭވިއޭޝަން އޮތޯީރިޓީން ވަސީލަތްތައް ފޯރުކޮށްދީގެން ކަމަށާއި، ވަކީން ހާއްސަކޮށް އިންސާނީ ވަސީލަތްތައް ފޯރުކޮށްދީގެން ކަމަށް މިނިސްޓަރު ވިދާޅުވި އެވެ.
" މި ރޮނގުން ދިމާވެފައިވާ ގޮންޖެހުންތަކުން އަރައިގަތުމަށް 2019 ވަނަ އަހަރު އަޅުގަނޑުމެން ވާނީ "އޭވިއޭޓާސް ނެކްސްޓް ޖެން" ގެ ނަމުގައި ސްކޮލާޝިޕް ސްކީމެއް ތައާރަފްކޮށްފައި. އަޅުގަނޑު ވަރަށް އުފަލާއެކު ފާހަގަކުރަން ބޭނުންވަނީ ސްކޮލާޝިޕްތަކުގެ ދަށުން ކިޔެވި ފަރާތްތައް މިހާރު އޮތޯރިތީއަށް ހިދުމަތްކުރަން ފަށާފައިވާކަން." މިނިސްޓަރ ނަހުލާ ވިދާޅުވި އެވެ.
