ނިއު ދިއްލީ، އިންޑިއާ (ޑިސެމްބަރު 6) - މިދިޔަ ފެބްރުއަރީ މަހު ޔޫކްރެއިން ހަނގުރާމަ ފެށުމާ އެކު އިންޑިއާއިން ރަޝިއާގެ ތެޔޮ ގަތުން އިތުރު ކުރުމަކީ "ބަލައިނުގަނެވޭނެ ގޯސް" ކަމެއްގެ ގޮތުގައި ޔޫކްރެއިނުން ސިފަކޮށްފި އެވެ.
ޔޫކްރެއިންގެ ފޮރިން މިނިސްޓަރު ޑިމީޓްރޯ ކުލެބާ އިންޑިއާގެ އެންޑީޓީވީއަށް ދެއްވި އިންޓަވިއުގައި ވިދާޅުވީ ޔޫރަޕުން ވެސް ރަޝިއާގެ ތެޔޮ ގަންނަ ކަމަށް ބުނެ، އިންޑިއާއިން ރަޝިއާގެ ތެޔޮ ގަތުން ދިފާއު ކުރުމަކީ "މުޅިން ގޯސް" ކަމެއް ކަމަށެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ދާދި ފަހުން ވިދާޅުވީ ޑިސްކައުންޓްތަކާ އެކު އިންޑިއާއިން ރަޝިއާގެ ތެޔޮ ގަންނަމުން ދިޔަ ނަމަވެސް، އެއީ ޔޫރަޕުން ގަންނަ ރަޝިއާގެ ތެލާ އަޅާ ބަަލާއިރު ކުޑަ މިންވަރެއް ކަަމަށެވެ.
"އަގުހެޔޮކޮށް ތެޔޮ ގަންނަން ތި ލިބެނީ ޔޫރަޕު މީހުންނާ ހެދިއެއް ނޫން. އެއީ އަޅުގަނޑުމެންނާ ހެދި. އަޅުގަނޑުމެންނަށް ކުރިމަތިވެފައިވާ ވޭނާއި ހިތާމައާ ހެދި. ރަޝިއާއިން އަޅުގަނޑުމެންނާ ދެކޮޅަށް ކުރަމުންދާ ހަނގުރާމައާ ހެދި،" ކުލެބާ ވިދާޅުވި އެވެ.
ޔޫކްރެއިން ހަނގުރާމަ ފެށި ފަހުން އިންޑިއާއިން ރަޝިއާގެ ތެޔޮ ގަތުން ހަ ގުނަ އިތުރު ކުރި އެވެ. އިންޑިއާގެ ނޫސްތަކުން ބުނާ ގޮތުގައި މިހާރު އެ ގައުމަށް އެންމެ ގިނައިން ސާފުނުކުރާ ތެޔޮ ސަޕްލައި ކުރާ ގައުމަކީ ރަޝިއާ އެވެ.
އިންޑިއާ ސަރުކާރުން ބުނަނީ ހަނގުރާމައިގެ ސަބަބުން އެތައް މިލިއަން ފަގީރުންނަށް ކުރާ އަސަރު ބޮޑުވަމުން ދާތީ އަގުހެޔޮކޮށް ތެޔޮ ގަތުން ނޫން ގޮތެއް ނެތް ކަމަށެވެ.
ހޯމަ ދުވަހު އިންޑިއާގެ ފޮރިން މިނިސްޓަރު އެސް ޖޭޝަންކަރް ވިދާޅުވީ އިންޑިއާއިން ތެލަށް ކުރާ ހޭދަ އިތުރުވަމުން ދަނީ ޔޫރަޕްގެ ގައުމުތަކުން މިހާރު މެދުއިރުމަަތިން ތެލާއި ގޭސް ހޯދުން އިތުރުކޮށްފައި ވާތީ ކަމަށެވެ.
"މެދުއިރުމައްޗަނީ ފެށުނީއްސުރެ އިންޑިއާ ކަހަލަ އިގްތިސާދުތަކަށް ސަޕްލައި ކުރާ ތަން. މިހާރު މިދާ ގޮތުން، މެދުއިރުމަތީގައި އަގުތަކަށް އެބަ ބާރުބޮޑުވޭ،" އޭނާ ވިދާޅުވި އެވެ.
