ދެ ކޮރެއާ ގުޅޭ ބޯޑަރު ކައިރީގައި މީހަކު މަރާލި މައްސަލައަކާ ގުޅިގެން ދެކުނު ކޮރެއާގެ ކުރީގެ ސެކިއުރިޓީ ވެރިޔާ ހައްޔަރުކޮށްފި އެވެ.
އެއީ 2020 ވަނަ އަހަރު ބޯޑަރު ކައިރީގައި އުތުރު ކޮރެއާއިން އޮފިޝަލަކު މަރާލި މައްސަލަ އެވެ. ސޫހް ހޫންއަށް ތުހުމަތު ކުރެވެނީ އެ މައްސަލައިގެ ހަގީގަތް ފޮރުވަން އުޅުނު ކަމަށެވެ.
އެ މައްސަލައިގައި ކުރީގެ ސަރުކާރުން އަމަލު ކުރީ ގޯސް ކަމަށް ގިނަ ބަޔަކު ތުހުމަތު ކުރެ އެވެ. އެހެންވެ، ރައީސް ޔޫން ސުކް ޔޯލް ވަނީ އެކަމުގެ ތަހުގީގު ފުޅާ ކުރުމަށް އަންގަވައިފަ އެވެ.
ސޫހް ހޫންއަކީ އެކަމާ ގުޅިގެން ހައްޔަރު ކުރި ކުރީ ސަރުކާރުގެ ފުރަތަމަ އިސް އޮފިޝަލެވެ. އޭނާއަށް ތުހުމަތު ކުރެވެނީ ޖާސޫސީ ރިޕޯޓުތައް ނައްތާލަން އަމުރު ކުރެއްވި ކަމަށެވެ.
އެ މައްސަލައިގައި ހިމެނޭ މަސްވެރިކަމާ ބެހޭ އޮފިޝަލް ލީ ދައެ ޖުން މަރުވީ ދެ ކޮރެއާ ވަކިވާ ކަނޑުގެ ބޯޑަރު ކައިރީގަ އެވެ.
ކުރީގެ ސަރުކާރުން ބުނީ ލީ ދައެ ޖުން މަސައްކަތް ކުރީ ދެކުނު ކޮރެއާގެ ބޯޑަރު ހުރަސްކޮށް އުތުރު ކޮރެއާއަށް އެތެރެވާން ކަމަށެވެ.
ހައްޔަރު ކުރި ސެކިއުރިޓީ އޮފިޝަލް ސޫހް ހޫންއަށް ކުރެވޭ ތުހުމަތުތަކުގެ ތެރޭގައި ހެކި ބަދަލުކޮށް، ކުރީ ސަރުކާރުގެ ދޮގު ވާހަކަ ހަގީގަތެއްގެ ގޮތުގައި ދެއްކުން ވެސް ހިމެނެ އެވެ.
މީގެ ކުރިން މިދިޔަ އޮކްޓޯބަރު މަހު އެ މައްސަލައާ ގުޅިގެން ހައްޔަރުކޮށްފައި ވަނީ ކުރީގެ ޑިފެންސް މިނިސްޓަރު ސޫހް ވުކް އާއި ކުރީގެ ކޯސްޓުގާޑު ވެރިޔާ ކިމް ހޮންގް ހީ އެވެ.
