ދޮންހިޔަލަ އާއި އަލިފުޅުގެ ވާހަކަ ގިނަ ބައެއްގެ ހަނދާނުގައި ހުންނާނެ އެވެ. ލޯބީގެ އެ ވާހަކައިގައި ޅައިމަގު ފަގީރު އަލީ ނުވަތަ ފަގީރު ކޮޔަކީ މުހިންމު ޝަހުސިއްޔަތެކެވެ. އެއްރެޔަކު އޭނާއަށް ހޭލެވުނީ ތ. ބުރުނީގައި ފަތްމިންޏަކު އުޅޭތަން ހުވަފެނުގައި ފެނިގެންނެވެ.
ފަގީރު އަލީ ބޭނުންވީ އަވަހަށް ބުރުންޏަށް ދިއުމަށެވެ. ފަތްމިނި ލޮލުން ދެކެ ކަށަވަރު ކުރުމަށް ފަހު ރަދުންނަށް އެ ހަބަރު ދިނުމަށެވެ. ބުރުންޏަށް ދާނެ ގޮތަކާމެދު ފިކުރު ކުރުމަށް ފަހު އަލީ ރޮއިހޭރިގަތީ ލޮލުގެ ފެނުން ގެއްލިއްޖެ ކަމަށް ހެދިގެންނެވެ. އަވަހަށް ބޭސްފަރުވާ އަށް ބުރުންޏަށް ދެވޭނެ ގޮތެއް ހަދައިދޭން އެދުނެވެ.
ޅައިމަގުގެ ދުވަސްވީ އިމާރާތެއް. -- ފޮޓޯ:އައިލްސް
ލޮލު ބޭހަށް ބުރަންޏަށް ފެށި ދަތުރުގައި މާލެއާ ކައިރި ވުމުން ކަތްޕަށް ކަފިދިދަ ނަގައި އަމަރާލި ނަގައި އޮޑީގެ ކުނބަށް ރަތް ދިދަ ނެގި އެވެ. އެއީ ރަދުންގެ ހާއްސަ ހުއްދައެއް ނެތި ކުރުން މަނާ ކަމެކެވެ. އެހެންވެ، އޮޑީގެ ވެރިޔާ ފޭބުމަށް މާލޭން އަމުރުކުރި އެވެ. ޖަވާބުގައި މަރުވާން ނުފައިބާނެމޭ، ލޮލަށް ބޭސް ކޮށްގެން އަންނަމުން، އެ ކުށް އަފޫ ކޮށްދޭ ވަރުގެ ވެދުމެއް ގެންނާނެ ކަމަށް ބުނެ ފަގީރު އަލީގެ އޮޑި ދުއްވާލައި އޮބައިލި އެވެ.
ރަދުންނަށް ދޮންހިޔަލަ ހޯދައި ދިނުމުގެ އެންމެ ބޮޑު އެހީތެރިޔަކީ ލޮލަށް ނުފެންނަ ކަމަށް ހެދިގެން ބުރުންޏަށް ގޮސް، ފަތްމިނީގެ ބުރުސޫރަ ބެލުމަށް ފަހު ރަދުންނަށް އެ ހަބަރު ދިން ފަގީރު އަލީ އެވެ.
ކުކުޅު ބިސް ބުރަށް އުފެދިފައިވާ ޅައިމަގަކީ ވެސް ރީތި ރަށެކެވެ. ށ. އަތޮޅުގެ އަތޮޅުވެރިކަން، ޖަނަވަރީ 1، 1968 ގައި ފުނަދުއަށް ބަދަލުވުމުގެ ކުރިން އެ އަތޮޅުގެ ވެރިކަންކުރީ އެ ރަށެވެ. އެ ރަށަށް ދެވިފައިވާ އިނގިރޭސި އަކުރާ ކޯޑަކީ ސީ-11 އެވެ. ރަށުގެ ބޮޑުމިނަކީ 28.5 ހެކްޓަރެވެ.
ވަރަށް ދުވަސްވީ، ބޮޑެތި މަހާނަ ގާތައް އެ ރަށުގައި ހުރިއިރު، މިސްކިތު ތަރާގަނޑު ކިޔާ ތަނެއް އޮވެ އެވެ. ރަށުގައި ބޮޑު ދެ ނިކަގަސް ހުރިއިރު، ފަގީރު އަގީރު އަލީގެ އޮޑި ބަން ކަމަށް ބުނާ އުސް ފަސްގަނޑު އެ ރަށުގައި އެބަ ހުއްޓެވެ.
ޅައިމަގު ގިނަ މީހުން އާމްދަނީ ހޯދަން ވަޒީފާ އަދާކުރަނީ ރިސޯޓުތަކުގަ އެވެ. ނަމަވެސް ރަށުގެ އާންމު ވިޔަފާރި ވެސް ރަނގަޅެވެ. ހަ ފިހާރަ އަކާއި ދެ ކެފޭ އާއި ތެލާއި ގޭހުގެ ވިޔަފާރިކުރާ ދެ ތަނެއް ހުރެ އެވެ. ތިން ސްޕީޑް ލާންޗް ދުއްވަ އެވެ.
ރައީސް އިބްރާހިމް މުހައްމަދު ސޯލިހުގެ ވެރިކަން ފެށުނުއިރު އެ ރަށުގައި ގިނަ މައްސަލަތަކެއް ހުއްޓެވެ. ބަނދަރެއް އޮތަސް ބަނދަރުގެ ދަތިކަން ބޮޑެވެ. ކަރަންޓުގެ މައްސަލަ ބޮޑެވެ. އެ ހުރިހާ މައްސަލައެއް ވަނީ ހައްލުކޮށްފަ އެވެ. ނަމަވެސް އަދިވެސް ކުރަން ހުރި މަސައްކަތް އެބަ ހުއްޓެވެ. ފެނާއި ނަރުދަމާގެ ނިޒާމު އަދި ގާއިމެއް ނުކުރެ އެވެ.
ފޯކުލޯރެއްގެ ގޮތުގައި ދެކެވެމުން އައި ދޮންހިޔަލަ އާއި އަލިފުޅުގެ ވާހަކަ އާއި ބުރުނީގައި ލޯބިން އުޅެމުން ދިޔައ އެ ދެމަފިރިންގެ ދެމެދަށް ކަތުރު ފަންޏެއްގެ ގޮތުގައި، ލޮލަށް ނުފެންނަ ކަމަށް ހެދިގެން ވަން ފަގީރު އަލީގެ ނަމަކީ ފަނޑުވާނެ ނަމެއް ނޫނެވެ. އޭނާއާއެކު އަބަދަށް ޅައިމަގުގެ ނަން ދިރެމުންދާނެ އެވެ.
titledesc
