ޖަރުމަނުގެ ހޮސްޕިޓަލެއްގައި އޮތް ބަލި މީހެއްގެ އޮކްސިޖެން މެޝިނުން މާ ބޮޑަށް އަޑުގަދަވާ ކަމަށް ބުނެ އެ މެޝިން ކަނޑާލި އެހެން ބަލި މީހަކު ހައްޔަރުކޮށްފި އެވެ.
މަންހެއިމް ސިޓީގައި ބަލި މީހެއްގެ އޮކްސިޖެން މެޝިން ދެ ފަހަރު ކަނޑާލިކަމުގެ ތުހުމަތުގައި ހައްޔަރު ކުރީ އުމުރުން 72 އަހަރުގެ އަންހެނެކެވެ.
ފުލުހުން ބުނީ އެ މީހާ ކޯޓަށް ހާޒިރުކޮށް ކަރެކްޝަންސްގެ ފެސިލިޓީއަކާ ހަވާލުކޮށްފައިވާ ކަމަށެވެ. މިދިޔަ އަންގާރަ ދުވަހު އޭނާ ހޮސްޕިޓަލެއްގައި އޮކްސިޖެން މެޝިން ކަނޑާލީ އަޑުގަދަ ވާތީ ކަމަށް ބުނެ އެވެ.
އޭގެ ފަހުން ހޮސްޕިޓަލުގެ މުވައްޒަފުން ވަނީ އަލުން މެޝިން ޖައްސައިފަ އެވެ. އަދި އެ މެޝިނަކީ އޭތި ގުޅާފައި އޮތް ބަލި މީހާ ދިރިހުރުމަށް މުހިއްމު އެއްޗެއް ކަމަށް މުވައްޒަފުން އެންގި އެވެ.
އެކަމަކު ދެ ވަނަ ފަހަރަށް ވެސް އެ މެޝިން ކަނޑާލި ކަމަށް ފުލުހުން ބުންޏެވެ. އޭގެ ސަބަބުން މެޝިން ގުޅާފައި އޮތް 79 އަހަރުގެ އަންހެން މީހާއަށް ސީޕީއާރް ދޭން ޖެހި، މިހާރު އޮތީ އައިސީޔޫގަ އެވެ.
އޮކްސިޖެން މެޝިން ބޭނުންކުރަނީ ބަލި މީހެއްގެ ހަށިގަނޑުގައިވާ ސެލްތަކާ ހަމައަށް އެކަށީގެންވާ މިންވަރަށް އޮކްސިޖެން ފޯރުކޮށްދިނުމަށެވެ.
