އީޔޫގެ ގަވާއިދުތަކާ އެއް ގޮތަށް އަމަަލު ކުރުމަަށް ޓްވިޓާގައި ދޮގު މައުލޫމާތު ފެތުރުން ހުއްޓުވުމަށް ކުރާ މަސައްކަތް ވަރުގަދަ ކުރަން ޖެހޭނެ ކަމަށް ބުނެ، ޔޫރަޕިއަން ޔޫނިއަން (އީޔޫ) އިން ޓްވިޓާގެ ވެރިޔާ އެލޮން މަސްކްއަށް އިންޒާރު ދީފި އެވެ.
އީޔޫގެ ޑިޖިޓަލް ގަވާއިދުތައް ތަންފީޒު ކުރުމާ ބެހޭ އެންމެ އިސް އޮފިޝަލް ތިއެރީ ބްރެންޓަން އެގޮތަށް ވިދާޅުވީ މަސްކްއަށް ކުރެއްވި ވީޑިއޯ ކޯލެއްގެ ތެރެއިންނެވެ. އޭނާ ވިދާޅުވީ އީޔޫގެ ގަވާއިދުތަކަށް ޓްވިޓާ ފައްތަން އަދިވެސް ގިނަ ކަންކަން ކުރަން ޖެހޭ ކަމަށެވެ.
"އީޔޫގެ ޑިޖިޓަލް ސާވިސަސް ގާނޫނާ އެއް ގޮތަށް ޓްވިޓާ 2.0 ހިންގަން އެލޮން މަސްކް ބޭނުންވުމަކީ އަޅުގަަނޑު މަރުހަބާ ކިޔާ ކަމެއް. އެކަމަކު އަދިވެސް ކުރަން ޖެހޭ މަސައްކަތް ބައިވަރު،" އޭނާ ވިދާޅުވި އެވެ.
އެގޮތުން ޓްވިޓާ ބޭނުންކުރާ މީހުންނާ ގުޅޭ ސިޔާސަތު ދެފުށްފެންނަ ސިޔާސަތަކަށް ހެދުމާއި، ކޮންޓެންޓް މޮޑަރޭޓް ކުރުން ކުޑަކޮށް، ހިޔާލު ފާޅުކުރުމުގެ މިނިވަންކަން ރައްކާތެރި ކުރުމާއި، ދޮގު މައުލޫމާތު ފެތުރުން ހުއްޓުވައި، ޓާގެޓްކޮށްގެން އިޝްތިހާރު ކުރުން މަދު ކުރަން ޖެހޭ ކަމަށް ފާހަގަކުރެއްވި އެވެ.
އެކަމާ ގުޅޭ ގޮތުން މަސްކް ސީދާ އެއްޗެއް ނުބުނެ އެވެ. އެކަމަކު މީހަކު ކުރި ޓްވީޓަކަށް ރަައްދު ދެމުން މަސްކް ބުނީ ކުރީގެ މެނޭޖްމަންޓުގެ ދަށުން އިތުބާރާއި ރައްކާތެރިކަން ކަށަވަރު ކުރުމުގައި ޓްވިޓާ ފެއިލްވެފައި އޮންނަތާ ވަރަށް ދުވަސްވެއްޖެ ކަމަށެވެ.
"ޓްވިޓާ 2.0 މާ ބޮޑަށް ވެސް ރަނގަޅުވެ، ހަމަހަމަކޮށް އޮވެ، ދެފުށްފެންނާނެ،" އެ ޕްލެޓްފޯމަށް ގެންނަމުންދާ ބަދަލުތަކާ ގުޅޭ ގޮތުން މަސްކް ބުންޏެވެ.
އީޔޫގެ އާ ޑިޖިޓަލް ސާވިސަސް ގާނޫނަށް އަމަަލު ކުރަން ފެށުމުގެ ކުރިން ކުންފުނިތައް ތައްޔާރުވުމަށް ވަގުތު ދެ އެވެ. އަންނަ އަހަރު އެ ގާނޫނު ތަަންފީޒު ކުރަން ފެށުމުން ގާނޫނާ ހިލާފުވާ ކުންފުނިތައް ބޮޑު އަދަދުން ޖޫރިމަނާކޮށް، ބައެއް ހާލަތްތަކުގައި އީޔޫގެ މާކެޓުގައި އޮޕަރޭޓް ކުރުން ވެސް މަަނާ ކުރެވޭނެ އެވެ.
