ދޯހާ، ގަތަރު (ޑިސެމްބަރު 1) - ވޯލްޑް ކަޕް ފުޓްބޯޅަ މުބާރާތުގައި މިރޭ، ޕޮލެންޑު އަތުން 2-0 އިން މޮޅުވެ، ދެ ވަނަ ބުރުގެ ޖާގައެއް އާޖެންޓީނާ އިން ހޯދިއިރު، ސައުދީ އަރަބިއްޔާ އަތުން 2-1 އިން މޮޅުވި ނަމަވެސް ފައިދާ ގޯލުގެ ތަފާތުން ކުރި ނުލިބި މެކްސިކޯ ވޯލްޑް ކަޕުގެ ގްރޫޕް ސްޓޭޖުން ކަޓަައިފި އެވެ.
މިރޭގެ ނަތީޖާތަކާ އެކު އާޖެންޓީނާ އަށް ގްރޫޕުގެ އެއް ވަނަ ލިބުނީ ހަ ޕޮއިންޓާ އެކުގަ އެވެ. ދެ ވަނަައިގައި އޮތް ޕޮލެންޑާއި ތިނެއްގައި ނިންމި މެކްސިކޯ އަށް ހަތަރު ޕޮއިންޓް ލިބުނު ނަމަވެސް ފައިދާ ގޯލުގެ ތަފާތުން ކުރި ލިބުނީ ޕޮލެންޑަށެވެ. ފައިދާ ގޯލު ހަމަހަމަކޮށް އޮއްވައި، މެކްސިކޯ ކެޓީ އެޓީމް ސައުދީއާ ދެކޮޅަށް ކުޅުނު މެޗުގެ އެންމެ ފަހު ވަގުތު ސައުދީ އިން ޖެހި ގޯލުންނެވެ.
މުބާރާތުގެ ދެ ވަނަ ބުރުގައި އާޖެންޓީނާ ނުކުންނާނީ ގްރޫޕް ސީގެ ދެ ވަނަ ހޯދި އޮސްޓްރޭލިއާއާ ދެކޮޅަށެވެ. ތާރީހީ ކުރިއެރުމެއް ހޯދައި، 1986 ވަނަ އަހަރުގެ ފަހުން ފުރަތަމަ ފަހަރަށް ވޯލްޑްކަޕްގެ ދެ ވަނަ ބުރުން ޖާގަ ހޯދި ޕޮލެންޑް ނުކުންނާނީ އެންމެ ފަހުގެ ޗެމްޕިއަން ފްރާންސާ ދެކޮޅަށެވެ.
ގްރޫޕްގެ ފަހު މެޗުގައި ޕޮލެންޑް އަތުން އާޖެންޓީނާ މޮޅުވި މެޗަކީ މިހާތަނަށް މި މުބާރާތުގައި އެ ޓީމުން އެންމެ ރަނގަޅު ކުޅުމެއް ދެއްކި މެޗެވެ. ގިނަ ހަމަލާތަކެއް އާޖެންޓީނާ އިން އުފެއްދިއިރު، ޕޮލެންޑުގެ ގޯލުގައި ހުރި ވޮޒްޝިއޭ ޝެޒްނީ ވަނީ ގިނަ ބޯޅަތަކެއް ދިފާއުކޮށްފަ އެވެ.
ފުރަތަމަ ހާފުގައި އާޖެންޓީނާގެ ފުރަތަމަ ހަމަލާ ފޮނުވާލީ މެސީ އެވެ. މި ބޯޅަ ކީޕަރު ޝެޒްނީ ވަނީ ދިފާއުކޮށް ކޯނަރަކަށް ބޭރުކޮށްލައިފަ އެވެ. އޭގެ ފަހުން ޖޫލިއެން އަލްވަރޭޒް ފޮނުވާލި ބޯޅައެއްވެސް ޝެޒްނީ ދިފާއުކުރި އެވެ.
ފުރަތަމަ ހާފުގައި ގޯލެއް ޖެހުމަށް އާޖެންޓީނާ އަށް ރަނުގެ ފުރުސަތެއް ލިބުނެވެ. މެސީއަށް އޭރިއާ ތެރެއިން ކުރި ފައުލަކަށް ރެފްރީ ދިން ޕެނަލްޓީ މެސީ ފޮނުވާލުމުން ކީޕަރު ޝެޒްނީ އެ ބޯޅަ ދިފާއުކުރި އެވެ. މިއީ ޝެޒްނީ މި ވޯލްޑްކަޕްގައި ދިފާއުކުރި ދެ ވަނަ ޕެނަލްޓީ އެވެ. އޭނާ ވަނީ ސައުދީއާ ދެކޮޅަށް ޕޮލެންޑް ކުޅުނު މެޗުގައިވެސް ޕެނަލްޓީއެއް ދިފާއުކޮށްފަ އެވެ.
އާޖެންޓީނާ އިން މެޗުގެ ފުރަތަމަ ގޯލު ޖެހީ ދެ ވަނަ ހާފުގެ ފުރަތަމަ މިނެޓުގަ އެވެ. އަރިމަތިން ނަހުއެލް މޮލީނާ ނަގައިދިން ހުރަހުން މި ގޯލު ޖަހައިދިނީ އެލެކްސިސް މެކެލިސްޓާ އެވެ. މިއީ ބްރައިޓަން އަށް ކުޅޭ މެކަލިސްޓާ އާޖެންޓީނާ ޓީމަށް ޖަހައިދިން ފުރަތަމަ ގޯލެވެ. އާޖެންޓީނާ އިން ލީޑު ފުޅާކުރީ މެޗުގެ 67 ވަނަ މިނެޓުގަ އެވެ. އެރިއާ ތެރެއިން ލިބުނު ބޯޅަ ކޮންޓްރޯލް ކުރުމަށްފަހު ގޯލުގެ މަތީ ކަނަށް ފޮނުވާލައިގެން މި ގޯލު ޖަހައިދިނީ އަލްވަރޭޒް އެވެ.
އާޖެންޓީނާ އަތުން ބަލިވި ނަމަވެސް ޕޮލަންޑު ދެ ވަނަ ބުރަށް ދިޔައީ ސައުދީ އަރަބިއްޔާ އަތުން ބޭނުންވިވަރުގެ ގޯލު ފަރަގަކާ އެކު މެކްސިކޯ އަށް މޮޅު ނުވެވުމުންނެވެ. މެކްސިކޯ އިން މި މެޗުގައި ތިން ގޯލު ޖަހަން ޖެހުނުއިރު، އެ ޓީމް މޮޅުވީ 2-1 ގެ ނަތީޖާ އަކުންނެވެ.
މެކްސިކޯގެ ކީޕަރު އޮޗޯއާ އާއި އެ ޓީމުގެ ތަރި ހާވިން ލޮޒާނޯ
ގަތަރުގެ ލުސެއިލް ސްޓޭޑިއަމުގައި މެކްސިކޯ އާއި ސައުދީ އަރަބިއްޔާ ވާދަކުރި މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ގޯލެއް ނުޖެހި އެވެ. ޖުމްލަ 23 ހަމަލާ މެކްސިކޯ އިން ފޮނުވާލި މި މެޗުގެ ފުރަތަމަ ގޯލު އެޓީމުން ޖެހީ ދެ ވަނަ ހާފުގެ ކުރީކޮޅުގަ އެވެ. އެ ޓީމަށް ލިބުނު ކޯނަރަކުން ހުރަސްވެގެން އައި ބޯޅަ ގޯލަށް ވައްދާލީ ހެންރީ މާޓިން އެވެ. އެ ޓީމުގެ ދެ ވަނަ ގޯލު ލިބުނު ހިލޭ ޖެހުމެއްގައި ފޮނުވާލި މޮޅު ބޯޅައަކުން ޖަހައިދިނީ ލުއިސް ޗާވޭސް އެވެ.
މި ސްކޯގައި އޮވެ، މެޗު ނިމުނު ނަމަވެސް ކުރި ލިބެން އޮތީ ޕޮލަންޑަށެވެ. ސަބަބަކީ 2-0 އިން މެކްސިކޯ މޮޅުވާނަމަ ޕޮއިންޓުގެ ގޮތުން ޕޮލަންޑާއި މެކްސިކޯ އެއްވަރުވެ، ފައިދާ ގޯލުގެ ތަފާތުން އެވަރުވެ، ޖެހި ގޯލާއި، ބައިކޮޅަށް ވަތް ގޯލު އެއްވަރުވެ، މި ދެ ޓީމު ކުޅުނު މެޗުގެ ނަތީޖާ ވެސް އެއްވަރުވެފައި އޮތުމުން، ފެއާ ޕްލޭ އުސޫލަށް ބަލައިގެން ޕޮލެންޑަށް ކުރި ލިބޭތީ އެވެ. ފެއާ ޕްލޭ އުސޫލަށް ބަލާއިރު މެޗުގެ އެހާތަނަށް މެކްސިކޯގެ ކުޅުންތެރިންނަށް މުބާރާތުގައި ހަތް ރީނދޫ ކާޑު ދައްކާފައި އޮތްއިރު، ޕޮލަންޑަށް ދައްކާފައިވަނީ ފަސް ރީނދޫ ކާޑެވެ.
އެހެންކަމުން ތިން ވަނަ ގޯލެއް ޖެހުމަށް މެކްސިކޯއަށް މަޖުބޫރުވި އެވެ. ގިނަ ކުޅުންތެރިން ކުރިއަށް ޖެހިލައިގެން ގޯލެއް ޖެހުމަ މެކްސިކޯ އިން މަސައްކަތް ކުރަމުން ދިޔަ ވަގުތު ސައުދީ އަރަބިއްޔާ އިން ފަރަގު ކުޑަކުރީ މެޗުގެ އިތުރު ވަގުތުގަ އެވެ. މި ގޯލު ޖަހައިދިނީ ކެޕްޓަން ސަލިމް އަލްދާސަރީ އެވެ. މި ގޯލާ އެކު މެކްސިކޯ މުބާރާތުން ކަޓައި ދެ ވަނަ ބުރުގެ ފުރުސަތު ޕޮލެންޑަށް ލިބުނެވެ.
ގްރޫޕް ސްޓޭޖާއި ހަމައިން މެކްސިކޯ އަށް މި ފަހަރުގެ ވޯލްޑް ކަޕް ނިމުނުއިރު، މިއީ 1978 ވަނަ އަހަރަށް ފަހު މެކްސިކޯ އިން ކުޅުނު ނުވަ ވޯލްޑް ކަޕުގެ ތެރެއިން، އެ ޓީމަށް ގަދަ ސޯޅައިގެ ޖާގައެއް ނުލިބުނު ފުރަތަމަ ފަހަރެވެ.
