އެމެރިކާގެ ކަންޓްރީ މިޔުޒިޝަން ޖޭކް ފްލިންޓް އާދީއްތަ ދުވަހު ކައިވެނި ކުރިތާ ގަޑިއިރުތަކެއް ފަހުން ކުއްލި ގޮތަކަށް މަރުވެއްޖެ އެވެ.
އުމުރުން 37 އަހަރުގެ ފްލިންޓް މަރުވީ ނިދީގަ އެވެ. އޭނާ މަރުވުމާ ގުޅިގެން މިޔުޒިކް އިންޑަސްޓްރީގެ މީހުން ވަނީ ހިތާމަ ފާޅުކޮށްފަ އެވެ.
ފްލިންޓް ފާހަގަވީ ކަންޓްރީ މިޔުޒިކްގެ ސަބް ޖޮންރާ "ރެޑް ޑާޓް" ލަވަތަކުގައި އަރަމުން އައި ތަރިއެއްގެ ގޮތުގަ އެވެ.
އޭނާގެ އަންހެނުން ބްރެންޑާ ޕޯސްޓު ކުރި ވީޑިއޯއެއްގައި ފެނިގެން ދަނީ ކައިވެންޏަށް ފަހު ދެ މީހުން އެކުގައި ނަށާ މަންޒަރެވެ.
ފްލިންޓްގެ ވެބްސައިޓުގައިވާ ގޮތުން އޭނާ މިޔުޒިކަށް ޝަައުގުވެރިވީ އޭނާގެ ބައްޕައަށް ޖެހުނު ބައްޔަކަށް ފަހު އެވެ. އެއީ އެމިއޮޓްރޮފިކް ލެޓެރަލް ސްކްލެރޮސިސް އެވެ.
އެ ބައްޔަކީ ސިކުނޑި އާއި މައިބަދައިގެ ނާރުގެ ސެލްތަކަށް އަސަރުކޮށް، ނާރުގެ ބާރު ކަނޑުވާލާ ބައްޔަކެވެ. ދަރިފުޅާ އެކު ކުޅެން ނޫޅެވޭތީ ގިޓާ ކުޅެން ދަސްކޮށްދިނީ ބައްޕަ އިސްނަގައިގެންނެވެ.
ފްލިންޓް ވަނީ 2016 އިން 2021 އަށް ހަތަރު އަލްބަަމް ނެރިފަ އެވެ. އޭގެ އިތުރުން އޮކްލަހޯމާ އާއި ޓެކްސަސް ސްޓޭޓުގެ މިޔުޒިކަލް ހޯލްތަކުގައި އޭނާ އާއްމުކޮށް ޝޯ ދެ އެވެ.
