އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕްގެ ލީޑަރު އަބޫ ހަސަން އަލް ހާޝިމީ އަލް ގުރައިޝީ މަރުވުމުން އާ ލީޑަރަކު ހަމަޖައްސައިފި އެވެ.
އައިއެސްއިން ބުދަ ދުވަހު ބުނީ އަބޫ ހަސަން މަރުވީ ހަނގުރާމައިގެ މައިދާނުގައި ކަމަށެވެ. އެކަމަކު އިތުރު ތަފްސީލް ހާމައެއް ނުކުރެ އެވެ.
އެ ގްރޫޕުން ނެރުނު އޯޑިއޯ މެސެޖެއްގައި ބުނީ އާ ލީޑަރަކަށް އައްޔަނު ކުރީ އަބޫ އަލް ހުސެން އަލް ގުރައިޝީ ކަމަށެވެ.
ގުރައިޝީގެ ނަމުން ނިސްބަތް ވަނީ ކީރިތި ރަސޫލާގެ ގަބީލާއަށެވެ. އައިއެސްގެ ލީޑަރުން ދައުވާ ކުރާ ގޮތުގައި އެ މީހުންނަކީ ގުރައިޝީ ދަރިކޮޅުގެ މީހުންނެވެ.
އިރާގާއި ސީރިއާގައި 2014 ވަނަ އަހަރު ބާރުގަދަވި އައިއެސް ހަނގުރާމައިން ބަލިވީ ހުޅަނގުގެ ގައުމުތަކުން ހެދި އަސްކަރީ ކޯލިޝަނުގެ އެހީގަ އެވެ.
އިރާގުން އައިއެސް ފައްސާލީ 2017 ގަ އެވެ. އޭގެ ދެ އަހަރު ފަހުން ސީރިއާއިން ވެސް އައިއެސްގެ ބާރު ނެތިގެން ދިޔަ އެވެ. އެކަމަކު ސިއްރުން އެ ގްރޫޕްގެ މެމްބަރުން އަދިވެސް ހަރަކާތްތެރިވެ އެވެ.
މިހާރު އައިއެސް އެންމެ ފާޅުކަން ބޮޑު ގޮތެއްގައި އުޅެނީ އަފްގާނިސްތާނާއި އިރާން އަދި އިޒްރޭލުގަ އެވެ. މި އަހަރު އެ ތިން ސަރަހައްދުގައި ހަމަލާތައް ވެސް ދިނެވެ.
ބުދަަ ދުވަހު ނެރުނު އޯޑިއޯ މެސެޖުގައި ބުނީ ގްރޫޕްގެ ހަތަރު ވަނަ ލީޑަރަކީ ތަޖުރިބާކާރު ހަނގުރާމަވެރިއެއް ކަމަށާއި ހުރިހާ މެމްބަރުން އާ ލީޑަރަށް ބައިއަތު ހިފަން ވާނެ ކަމަށެވެ.
އެ ގްރޫޕްގެ އެންމެ ފުރަތަމަ ލީޑަރު އަބޫ ބަކުރު އަލް ބަގުދާދީ މަރާލީ އޮކްޓޯބރު 2019 ގައި ސީރިއާގަ އެވެ. ދެ ވަނަ ލީޑަރު އަބޫ އިބްރާހިމް އަލް ގުރައިޝީ މަރާލީ ސީރިއާގައި މި އަހަރުގެ ފެބްރުއަރީގަ އެވެ.
