ބޭންކް އޮފް މޯލްޑިވްސްގެ ވަޒީފާގައި އެންމެ ގިނަ ދުވަސްވަންދެން ދެމި ތިބި މުވައްޒަފުންގެ އަގު ވަޒަންކޮށް އެ މުވައްޒަފުންނަށް ހަނދާނީ ފިލާ ދީފި އެވެ.
ދަރުބާރުގޭގައި ރޭގައި ކުރިއަށް ގެންދިޔަ ހަފްލާގައި އެ ކުންފުނިން ވަނީ ޖުމްލަ 68 މުވައްޒަފަކަށް ހަނދާނީ ފިލާ ދީފަ އެވެ. އެގޮތުން، އެ ކުންފުންޏަށް ހިދުމަތް ކުރުމުގައި 15 އަހަރުން ފެށިގެން ގޮސް 40 އަހަރާ ހަމައަށް ހިދުމަތް ކޮށްދީފައިވާ މުވައްޒަފުންނަށް އެވޯޑު ދީފައިވެ އެވެ.
މި ހަފްލާގައި ބީއެމްއެލްގެ ހިދުމަތް ފުރަތަމަ ދޭން ފެށީއްސުރެ އެ ބޭންކުގެ މުވައްޒަފުންގެ ގޮތުގައި ތިބި ތިން މީހަކަށް ވަނީ 40 އަހަރުގެ ހިދުމަތުގެ އަގުވަޒަންކޮށް ހާއްސަ އިނާމެއް ވެސް އަރުވާފަ އެވެ. އެއީ، އެ ބޭންކުގެ ޑެޕިއުޓީ ސީއީއޯގެ މަގާމުގައި މިހާރު ހުންނެވި، އައިޝަތު ނޫރައްދީނާއި ބީއެމްއެލްގެ ޑިވެލޮޕްމެންޓު ބޭންކިން ޑައިރެކްޓާ، ފާތިމަތު މަނިކެ އަދި ސީނިއާ ފެސިލިޓީސް އޮފިސާ މޫސާ މުހައްމަދެވެ.
ބީއެމްއެލްގެ ސީއީއޯ އެ ބޭންކުގެ ވަޒީފާގައި އެންމެ ގިނަ ދުވަސްވީ ތިން މުވައްޒަފުންނާ އެކު -- ފޮޓޯ: ބީއެމްއެލް
އޭގެ އިތުރުން ބީއެމްއެލްގެ ސީނިއާ ރީކޮންސިލިއޭޝަން އޮފިސަރުގެ މަގާމުގައި ހުންނެވި، ފިރާގު އަހުމަދަށް ވެސް ވަނީ އެ ބޭންކަށް 35 އަހަރު ހިދުމަތް ކޮށްދެއްވާފައިވާތީ ހާއްސަ އިނާމެއް އަރުވާފަ އެވެ.
ބީއެމްއެލްގައި ގިނަ ދުވަސްތަކެއް ވަންދެން ހިދުމަތް ކޮށްދެއްވި ފަރާތްތަކުން ބޭންކިން ދާއިރާއިން ހޯދާފައިވާ އިލްމާއި ތަޖުރިބާ އަކީ ދެވަނައެއް ނުވާފަދަ ހިދުމަތެއް ކަމަށް އެ ކުންފުނީގެ ސީއީއޯ ކާލް ސްޓުމްކަ ވިދާޅުވި އެވެ. އަދި، ރާއްޖޭގެ އެންމެ ކުރިއަރާފައި އޮތް ބޭންކުގެ ގޮތުގައި ބީއެމްއެލް ދެމެހެއްޓުމަށް ގިނަ އަހަރުތަކެއް ވަންދެން އެ މުވައްޒަފުން ކޮށްދެއްވި މިންނެތް ބުރަ މަސައްކަތަށް އޭނާ ޝުކުރު އަދާކުރެއްވި އެވެ.
ބޭންކު އޮފް މޯލްޑިވްސް އަކީ އެންމެ ގިނަ އަދަދަކަށް ދިވެހިންނަށް ވަޒީފާގެ ފުރުސަތު ފަހިކޮށްދީފައިވާ ކުންފުންޏެވެ. އެ ކުންފުނީގެ މުވައްޒަފުންގެ 99 އިންސައްތަ އަކީ ދިވެހީންނެވެ.
ބީއެމްއެލްގެ ވަޒީފާގައި އެންމެ ގިނަ ދުވަސްވީ މުވައްޒަފުންނަށް ހަނދާނީ ފިލާ އެރުވުމަށްފަހު އެ ބޭންކުގެ ސީއީއޯ ވާހަކަދައްކަވަނީ -- ފޮޓޯ: ބީއެމްއެލް
ބީއެމްއެލް އިން ބުނީ ބައިނަލްއަގުވާމީ މައިދާނުގައި ގެންގުޅޭ އެންމެ ރަނގަޅު އުސޫލުތަކާއި ގަވާއިދުތައް ބަލައި ދިރާސާ ކުރުމަށްފަހު އެ ބޭންކުގެ މުވައްޒަފުންނާ ގުޅޭ އުސޫލުތައް އެންމެ ކުރިއަރާފައިވާ އުސޫލުތަކާ އެއްގޮތަށް އެކުލަވާލުމުގެ މަސައްކަތް ކުރަމުންދާ ކަމަށެވެ. އެގޮތުން، ބޭންކުން ވަޒީފާ ދިނުމާއި ތަމްރީނު ފޯރުކޮށްދިނުމާއި މުވައްޒަފުންގެ އަގުވަޒަން ކުރުމުގެ ސިޔާސަތުތަކަށް ފާހަގަކޮށްލެވޭ ވަރުގެ ބޮޑެތި ބަދަލުތަކެއް ގެންނަމުންދާ ކަމަށް ބީއެމްއެލް އިން ބުނެ އެވެ.
ބޭންކުގައި ވަޒީފާ އަދާކުރާ އެންމެ ރަނގަޅު މުވައްޒަފުންގެ އަގުވަޒަންކޮށް އެފަރާތްތަކުގެ އިހުލާސްތެރި ހިދުމަތްތައް ފާހަގަކުރުމަށް އެ ބޭންކުން އަންނަނީ ސްޓާފް އެވޯޑު އަދި ލޯންގު ސާވިސް އެވޯޑު ފަދަ ހަރަކާތްތައް ބާއްވަމުންނެވެ.
