ޗައިނާގެ ކުރީގެ ރައީސް ޖިއާންގް ޒެމިން ބުދަ ދުވަހު އުމުރުފުޅުން 96 އަހަރުގައި އަވަހާރަވެފައިވާ ކަމަށް ޗައިނާގެ ދައުލަތުގެ މީޑިއާއިން ރިޕޯޓުކޮށްފި އެވެ.
ޝިންހުއާ ނިއުސް އެޖެންސީއިން ބުނީ ޖިއާންގް އަވަހާރަވީ ލޫކީމިއާ ކުރިމަތިވެ ގުނަވަންތައް ފެއިލްވުމުން ބުދަ ދުވަހުގެ މެންދުރު 12:13 ގައި ޝަންހާއީގައި ކަމަށެވެ.
ނަވާރަ ސަތޭކަ އަށްޑިހައިގެ އަހަރުތަކުން ފެށިގެން ދެހާހުގެ އަހަރުތަަކާ ހަމައަށް ޗައިނާއަށް ބޮޑެތި އިންގިލާބީ ބަދަލުތަކެއް އަންނަމުން ދިޔަ އިރު، ގައުމުގެ އިސްވެރިޔަކީ ޖިއާންގް އެވެ.
ޖިއާންގް ރައީސްކަމަށް ވަޑައިގެންނެވީ 1989 ވަނަ އަހަރު އެވެ. އޭރު ޗައިނާ އޮތީ އިގްތިސާދީ ޒަމާނީ ކުރުމުގެ މަސައްކަތުގެ އެންމެ ފުރަތަމަ މަރުހަލާގަ އެވެ.
ދެހާސް ތިން ވަނަ އަހަރު ރައީސްކަމުން ރިޓަޔާ ކުރެއްވި އިރު، ޗައިނާއަކީ ވޯލްޑް ޓްރޭޑް އޯގަނައިޒޭޝަންގެ މެމްބަރެކެވެ. އަދި 2008 ވަނަ އަހަރު އޮލިމްޕިކްސް ޗައިނާގައި ބޭއްވުމުގެ ފުރުސަތު ހޯދި އެވެ.
ޗައިނާއަކީ ދުނިޔޭގެ ގަދަބާރެއްގެ ގޮތުގައި މަގްބޫލުކަން ހޯދައި، ދުނިޔޭގެ ފެންވަރުގައި ޗައިނާ ކުރިއެރުންތައް ހޯދީ ޖިއާންގް ރައީސްކަމުގައި ހުންނެވި އިރު އެވެ.
އެނެލިސްޓުން ބުނާ ގޮތުގައި ރައީސްކަމުން ރިޓަޔާ ކުރެއްވި ނަމަވެސް ޗައިނާގެ ސިޔާސީ ދާއިރާގައި ޖިއާންގްގެ ނުފޫޒު ވަރަށް ބޮޑަށް ދެމިއޮތެވެ.
އެމަނިކުފާނު އަވަހާރަވި އިރު އަނބިކަނބަލުންނާއި ދެ ފިރިހެން ބޭފުޅުން ދުނިޔޭގައި އެބަ އުޅުއްވަ އެވެ.
