ޕާކިސްތާނުގެ ތާލިބާނުން ބުދަ ދުވަހު ދިން ހަމަލާއެއްގައި ތިން މީހުން މަރުވެ 23 މީހުންނަށް އަނިޔާވެއްޖެ އެވެ.
ތެހްރީކޭ ތާލިބާން ޕާކިސްތާން (ޓީޓީޕީ) އިން އެ ހަމަލާ ދިނީ ފުލުހުންގެ އުޅަނދަކަށް އަމާޒުކޮށް ޓެރަރިސްޓަކު އަމިއްލައަށް މަރުވެގެންނެވެ.
ޓީޓީޕީއަކީ އަފްގާނިސްތާނުގެ ތާލިބާނުންނާ ތަފާތު ގްރޫޕެކެވެ. އެހެން ނަމަވެސް، ދެ ގްރޫޕުން ވެސް ގެންގުޅެނީ އެއް ކަހަލަ ވިސްނުންތަކެކެވެ.
ޕާކިސްތާނުގައި 2007 ވަނަ އަހަރުން ފެށިގެން ދެމުން އަންނަ ބޮޑެތި ހުރިހާ ޓެރަރިސްޓް ހަމަލާއެއްގެ ފަހަތުގައި ވަނީ ނުރައްކާތެރި ޓީޓީޕީ އެވެ.
ޓީޓީޕީއިން މިދިޔަ ހޯމަ ދުވަހު ބުނީ ވަގުތީ ގޮތުން ސުލްހަ ގާއިމް ކުރަން މިދިޔަ ޖޫން މަހު ސަރުކާރާ އެކު އެކުލަވާލި އެއްބަސްވުން ނިމުމަކަށް ގެނެސްފައިވާ ކަމަށެވެ.
"މުޖާހިދުންނާ ދެކޮޅަށް ގައުމުގެ އެކި ކަންކޮޅުތަކުގައި އަސްކަރީ އޮޕަރޭޝަންތައް ދަނީ ހިންގަމުން. އެހެންވީމާ، މެމްބަރުން ތިބި ތަނެއްގައި ތިބެގެން ހަމަލާތައް ދެމުން ދިޔުން ކޮންމެހެން ވެސް މުހިއްމު،" ޓީޓީޕީއިން ނެރުނު ބަޔާނެއްގައި ބުންޏެވެ.
ފުލުހުން ބުނީ ބުދަ ދުވަހު ހަމަލާ ދިނީ ހުޅަނގު ގެތާ ސިޓީގައި ޕޯލިއޯ ވެކްސިން ޖެހުމުގައި އުޅުނު ޓީމެއްގެ ސެކިއުރިޓީ ބަލަހައްޓަމުން ދިޔަ ފުލުހުންނަށް އަމާޒުކޮށް ކަމަށެވެ.
މަރުވީ ފުލުހަކާއި، އަންހެނަކާއި ކުޑަކުއްޖެކެވެ. ޓީޓީޕީއިން ބުނީ ހަމަލާ ދިނީ ވަގުތީ ސުލްހައިގެ އެއްބަސްވުމާ ހިލާފަށް އެ ގްރޫޕްގެ ފައުންޑިން މެމްބަރު އުމަރް ހާލިދް މަރާލުމުން، ބަދަލު ހިފުމަށް ކަމަށެވެ.
"ބަދަލު ހިފުމުގެ ހަމަލާތައް ހުއްޓުމެއް ނެތި ކުރިއަށް ދާނެ،" ޓީޓީޕީގެ ބަޔާނުގައި ބުންޏެވެ.
ޕާކިސްތާނުގެ ރަށްފުށުގެ ހިސާބުގަނޑުގެ ބޮޑު ސަރަހައްދެއް މީގެ ކުރިން ޓީޓީޕީއިން ކޮންޓްރޯލް ކުރި އެވެ. އެ ތަންތަނުގައި ތަންފީޒު ކުރީ އެ ގްރޫޕުން ގަބޫލުކުރާ ހަމަތަކެވެ.
ޓެރަރިޒަމާ ދެކޮޅު މަސައްކަތުގެ ތެރެއިން ޓީޓީޕީގެ ގިނަ މެމްބަރުން ޕާކިސްތާނުން ފައްސާލި އެވެ. ދެހާސް ދިހަ ވަނަ އަހަރުން ފެށިގެން ގިނަ މެމްބަރުން އުޅެނީ އަފްގާނިސްތާނުގަ އެވެ.
އަފްގާނިސްތާނުގެ ތާލިބާނުން ވެރިކަމަށް އައުމާ އެކު ޓީޓީޕީއަށް ވެސް އާ ހިތްވަރެއް ލިބި، ޕާކިސްތާން ސަރުކާރާ ދެކޮޅަށް މަސައްކަތް ވަރުގަދަ ކުރަން ނިންމި އެވެ.
