ޗައިނާގެ ޝަންހާއީގައި ކޮވިޑް ފިޔަވަޅުތަކާ ދެކޮޅަށް ކުރި މުޒާހަރާއެއް ރިޕޯޓު ކުރަން އުޅުނު ބީބީސީގެ ނޫސްވެރިޔަކު ހައްޔަރުކޮށް އަނިޔާކުރި ކަމަށް ބުނާ މައްސަލައިގައި ޗައިނާގެ ސަފީރު އިނގިރޭސި ފޮރިން އޮފީހަށް ހާޒިރުކޮށްފި އެވެ.
ސަފީރު ޝެންގް ޝެގުއާންގް ފޮރިން އޮފީހަށް ހާޒިރު ކުރީ ފޮރިން ސެކެޓްރީ ޖޭމްސް ކްލެވެލީ އެވެ. އެއީ ބީބީސީގެ ކެމެރާމަން އެޑްވާޑް ލޯރެންސަށް ޗައިނާގެ ފުލުހުން އަނިޔާކުރި ކަމަށް ބުނާ މައްސަލައިގައި ހިތްހަމަނުޖެހުން ފާޅުކުރުމަށެވެ.
"ޗައިނާގެ ފަރާތްތަކުގެ މި އަމަލު ބަލައިނުގަންނާނެކަން އަޅުގަނޑުމެން ވާނީ ސާފުކޮށް ބަޔާންކޮށްފައި،" ފޮރިން އޮފީހުން ބުންޏެވެ.
އިނގިރޭސި ބޮޑު ވަޒީރުގެ އޮފީހުން ވެސް ވަނީ އެކަން ބަލައިނުގަނެވޭނެ ކަމަށް ބުނެފަ އެވެ. އެ އޮފީހުން ބުނީ "އެއްވެސް ބިރެއް ނެތި ނޫސްވެރިންގެ ޒިންމާ އަދާކުރުމުގެ ފުރުސަތު އޮންނަން ޖެހޭނެ" ކަމަށެވެ.
ބީބީސީއިން ބުނީ ކެމެރާމަން ހައްޔަރުކޮށް، ބިޑި އަޅުވައި، އަނިޔާކުރީ ޝަންހާއީގެ މުޒާހަރާގެ ތެރެއިން ކަމަށެވެ. އޭނާ އަތުގައި ނޫސްވެރިކަން ކުރުމުގެ ލިޔުންތައް ހަމައަށް ހުރި ކަމަށް ބީބީސީއިން ބުންޏެވެ.
ބީބީސީއިން ބުނީ ކެމެރާމަން ހައްޔަރު ކުރީ "އޭނާގެ އަމިއްލަ ރައްކަލަކަށްޓަކައި" ކޮވިޑް ޖެހިދާނެތީ ކަމަށް ޗައިނާގެ އިދާރާތަކުން ބުނި ކަމަށެވެ.
ޗައިނާގެ ފޮރިން މިނިސްޓްރީގެ ތަރުޖަމާން ޝާއޯ ލިޖިއާން ވިދާޅުވީ ލޯރެންސަކީ ނޫސްވެރިއެއްކަން އަންގައިދޭ ލިޔުންތައް ފުލުހުންނަށް ނުދެއްކި ކަމަށެވެ.
ސޯޝަލް މީޑިއާގައި އާއްމުވި ވީޑިއޯއެއްގައި ފެންނަނީ އެ ނޫސްވެރިޔާ ބިންމައްޗަށް ވައްޓާލައި ބިޑި އަޅުވާ މަންޒަރެވެ. އެހެން ވީޑިއޯއެއްގައި އޭނާ ގޮވަމުން ދިޔައީ އިނގިރޭސި ކޮންސިއުލޭޓަށް ގުޅުމަށެވެ.
