މޯލްޑިވްސް އިސްލާމިކް ބޭންކުގެ ހުޅުމާލެ ބުރާންޗު ފިތުރޯނު މަގުގައި ހުންނަ ވަން އެވެނިއު އިމަރާތަށް ބަދަލު ކުރުމަށް އެ ބޭންކުން ނިންމައިފި އެވެ.
ވަން އެވެނިއުގައި އަލަށް ހުޅުވާ ގޮފިން ހިދުމަތް ދޭން ފަށާނީ މިއަންނަ އާދީއްތަ ދުވަހު އެވެ. އެ ބޭންކުގެ ހުޅުމާލެ ބުރާންޗު މިހާރު ހުންނަނީ ސެންޓުރަލް މޯލްގަ އެވެ.
އިސްލާމިކް ބޭންކުގެ ހުޅުމާލެ ބުރާންޗު ބަދަލު ކުރުމަށް ނިންމާފައިވާ ސަރަހައްދު -- ފޮޓޯ: އެމްއައިބީ
އިސްލާމިކް ބޭންކުން ބުނީ އާ އިމާރާތަށް އެ ގޮފި ބަދަލު ކުރާއިރު، އެތަނުގައި ގާއިމު ކުރާ އޭޓީއެމް ސެންޓަރުން 24 ގަޑިއިރު ޗެކާއި ފައިސާ ޖަމާ ކުރުމުގެ ހިދުމަތް ލިބޭނެ ކަމަށާއި މި ބަދަލާ އެކު އެ ބޭންކުގެ ހިދުމަތް ހޯދާ ފަރާތްތަކަށް މިހާރަށް ވުރެ ފަހި މާހައުލަކުން ފަސޭހަ ކަމާ އެކު ހިދުމަތް ލިބޭނެ މަގު ތަނަވަސްވެގެން ދާނެ ކަމަށެވެ.
މި ބަދަލަކީ ހުޅުމާލެ ފޭސް ދޭއްގައި މީހުން ދިރިއުޅެން ފެށުމާ އެކު އެ އަވަށުގެ އާބާދީ ބޮޑުތަނުން އިތުރުވެފައި ވުމުގެ ސަބަބުން އެ ބޭންކުން ހުޅުމާލޭގައި ދެމުން އަންނަ ހިދުމަތް އިތުރަށް ފުޅާ ކުރުމުގެ ވިސްނުމުގައި ގެންނަ ބަދަލެއް ކަމަށް އެ ބޭންކުން ބުނެ އެވެ.
މި ބަދަލާ ގުޅޭ ގޮތުން އިތުރު މައުލޫމާތެއް ނުވަތަ އިތުރު އެހީތެރިކަމެއް ބޭނުންވާ ނަމަ އެ ބޭންކުގެ ކަސްޓަމާ ކެއާ ސެންޓަރުގެ އީމެއިލް customercare@mib.com.mv އަށް މެއިލް ކުރުމަށް އިސްލާމިކް ބޭންކުން އެދެ އެވެ.
