ޕެސިފިކް ކަނޑުގައި އޮންނަ ޖަޒީރާ ގައުމެއް ކަމުގައިވާ ސޮލޮމޮން އައިލެންޑްސްގެ ހުޅަނގު ދެކުނު މަލާންގޯ ސަރަހައްދަށް 7.0 މެގްނިޓިއުޑް ބާރުމިނުގެ ބިންހެލުމެއް އައިސްފި އެވެ.
މިހާތަނަށް އެއްވެސް މީހަކު މަރުވި ކަމުގެ އަދި އަނިޔާއެއް ލިބުނު ކަމުގެ ރިޕޯޓެއް ނާދެ އެވެ. އެކަމަކު ވެރިރަށް ހޮނިއަރާއަށް 20 ސިކުންތު ވަންދެން ބިންހެލުމުގެ އަސަރު ކުރި އެވެ.
ސުނާމީގެ އިންޒާރު ނެރުމާ އެކު ބޮޑު ވަޒީރުގެ އޮފީހުން އާއްމުންނަށް އެންގެވީ އައްސޭރިފަށުގެ ހިސާބުތައް ދޫކޮށް ދިޔުމަށެވެ. އެކަމަކު ސުނާމީގެ ނުރައްކަލެއް ނެތް ކަމަށް ފަހުން ބުންޏެވެ.
އެމެރިކާއިން ހިންގާ ޕެސިފިކް ސުނާމީ ވޯނިން ސެންޓަރުން ވެސް ބުނީ ސުނާމީއެއް އަރާނެ ކަމަށް ނުބެލެވޭ ކަމަށެވެ.
ބިންހެލުން އައީ ސޮލޮމޮން އައިލެންޑްސްގެ ގަޑިން މެންދުރު 01:00 ހާއިރު ބިމުގެ 15 ކިލޯމީޓަރު އަޑިން، އައްސޭރިފަށާ ހުޅަނގު ދެކުނުން 18 ކިލޯމީޓަރު ދުރުންނެވެ.
އޭގެ ސަބަބުން ބޮޑު ސަރަހައްދަކުން ކަރަންޓު ކެނޑި، ހޮނިއަރާގެ އިމާރާތްތަކުގައި ތިބި މީހުން މަގުތަކަށް ނިކުތެވެ. އެއަށްފަހު ވެސް އެ ސަރަހައްދަށް އިތުރު ތިން ލޮޅުން ކުރިމަތިވި އެވެ.
ސޮލޮމޮން އައިލެންޑްސްގެ މީޓިއޮރޮލޮޖިކަލް ސާވިސްގެ ޑިރެކްޓަރު ޑޭވިޑް ހިބާ ހިރިއާސިއާ ނަސޭހަތް ދެއްވީ އިތުރު ބާރުގަދަ ލޮޅުންތައް އަންނާނެ ކަމަށް ބެލެވޭތީ ސަމާލުވެ ތިބުމަށެވެ.
ސޮލޮމޮން އައިލެންޑްސްއަށް ބޮޑު ބިންހެލުމެއް އައިސްފައިވާ އިރު، އާދީއްތަ ދުވަހު އިންޑޮނީޝިއާއަށް އައި ބިންހެލުމެއްގައި 162 މީހުން މަރުވި އެވެ.
ސޮލޮމޮން އައިލެންޑްސް އާއި އިންޑޮނީޝިއާ އޮންނަނީ ޕެސިފިކް ކަނޑުގެ "ރިންގް އޮފް ފަޔާ" ގަ އެވެ. އެއީ އާއްމުކޮށް ބިންހެލުންތައް އެންމެ ގިނައިން އަންނަ ހިސާބެވެ.
