ދުނިޔޭގައި އެންމެ ގިނަ ދުވަހު ރައީސްކަން ކުރަމުން ގެންދަވާ އިކުއެޓޯރިއަލް ގިނީގެ ރައީސް ޓިއޮޑޯރޯ އޮބިއާންގް އާ ދައުރަކަށް ކުރިމަތިލައްވައިފި އެވެ.
އުމުރުން 80 އަހަރުގެ އޮބިއާންގް ރައީސްކަން ކުރައްވާތާ 43 އަހަރުވެއްޖެ އެވެ. އިކުއެޓޯރިއަލް ގިނީގައި އިންސާނީ ހައްގުތަކާ ހިލާފު ގިނަ އަމަލުތަކެއް ހިނގަމުންދާ ކަމަށް ތުހުމަތު ކުރެވެ އެވެ.
އިންތިހާބުގައި ބައެއް އިދިކޮޅު ކެންޑިޑޭޓުން ވާދަކުރި ނަމަވެސް، އިންސާފުވެރި އިންތިހާބެއް ބޭއްވޭނެ ކަމަށް ނުބެލެވޭތީ އެހެން އެއްވެސް ކެންޑިޑޭޓަކަށް ކުރިނުލިބޭނެކަން ސާފެވެ.
ތެލުގެ މުއްސަނދިކަން އޮތް އެފްރިކާގެ ގައުމު ފުރިހަމައަށް ކޮންޓްރޯލް ކުރައްވަނީ ރައީސް އޮބިއާންގް އެވެ. ސަރުކާރުގެ މުހިއްމު މަގާމުތައް ފުރުއްވަނީ އެމަނިކުފާނުގެ އާއިލީ ބޭފުޅުންނެވެ.
އެގޮތުން ނައިބު ރައީސްކަމުގައި ހުންނަވަނީ ދަރިކަލުން ޓިއޮޑޯރޯ ންގުއެމާ އޮބިއާންގް އެވެ. އެމަނިކުފާނު ދިރިއުޅުއްވަނީ އެމެރިކާ އާއި ޔޫރަޕްގަ އެވެ.
އިނގިރޭސިވިލާތުން ބުނާ ގޮތުގައި ޕޮޕް ލަވައިގެ ރަސްގެފާނު މައިކަލް ޖެކްސަން ބޭނުންކުރި ޖަވާހިރުން ޖަރީކޮށްފައިވާ އަންގި، މިހާރު އޮންނަނީ ނައިބު ރައީސް ޓިއޮޑޯރޯ ންގުއެމާ އޮބިއާންގް އަތްޕުޅުގަ އެވެ.
އިކުއެޓޯރިއަލް ގިނީގައި އެއްވެސް ސިޔާސީ މިނިވަންކަމެއް ނޯވެ އެވެ. އިދިކޮޅު ފަރާތްތަކާ ދެކޮޅަށް އަނިޔާވެރި އަމަލުތައް ހިންގައި، ގިނަ ބަޔަކު ވީނުވީއެއް ނޭނގި ގެއްލިފައިވެ އެވެ.
އޭގެ އިތުރުން ނޫސްވެރިކަމުގެ މިނިވަންކަމެއް ވެސް އެ ގައުމުގައި ނޯވެ އެވެ. ރައީސް އޮބިއާންގް ވަނީ އެމަނިކުފާނާ ދެކޮޅަށް ކުރާ ތުހުމަތުތައް ދޮގުކުރައްވައިފަ އެވެ.
އެމަނިކުފާނު ބޭނުންވަަނީ ބައިނަަލްއަގްވާމީ މުޖުތަމައުގެ ރުހުން ހޯއްދެވުމަށެވެ. އެގޮތުން މިދިޔަ ސެޕްޓެމްބަރު މަހު އިކުއެޓޯރިއަލް ގިނީގައި މަރުގެ ހުކުމް ތަންފީޒު ކުރުން އުވާލި އެވެ.
އޮބިއާންގް ރައީސްކަމަށް ވަޑައިގެންނެވީ އަސްކަރީ ބަގާވާތަކަށް ފަހު 1979 ގަ އެވެ. އޭގެ ފަހުން އެމަނިކުފާނުގެ ސަރުކާރު ވައްޓާލަން ވެސް އެތައް ފަހަރަކު އެކި ފަރާތްތަކުން މަސައްކަތް ކުރި އެވެ.
