މި ހަފުތާގެ ތެރޭގައި ފުލުހުންނާއި ސިފައިން ގުޅިގެން ހިންގި ކައުންޓާ ޓެރަރިޒަމް އޮޕަރޭޝަނުގައި ހުއްޓުވި ޓެރަރިސްޓު ހަމަލާ ހުއްޓުވުމުގެ މަސައްކަތް މި އަހަރުގެ ޖޫން މަހުގެ ތެރޭގައި ފުލުހުން ފެށި ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރާއްޖޭގައި ދީނީ ހަރުކަށި ފިކުރު ފެތުރިފައިވާ މިންވަރާ މެދު ވާހަކަ ދައްކަވަމުން ހަމީދު ވިދާޅުވީ ހުއްޓުވުނު ހަމަލާ ކާމިޔާބުވިނަމަ ގިނަ ބައެއްގެ ފުރާނަ ގެއްލުމުގެ ފުރުސަތު އޮތް ކަމަށެވެ.
"މި އަހަރުގެ ޖޫންއިން ފެށިގެން އަޅުގަނޑުމެން ބަލަމުންދިޔަ ކަންކަމުގެ މައްޗަށް އަޅުގަނޑުމެން ނޮވެމްބަރު 11 ވަނަ ދުވަހު އައްޑޫގައި އޮޕަރޭޝަން ހިންގީ" ކޮމިޝަނާ ހަމީދު.
ކޮމިޝަނާ އިތުރަށް ވިދާޅުވެފައިވަނީ ރާއްޖޭގައި މިހާރު ޓެރަރިޒަމްގެ އަމަލުތައް ބޮޑަށް ހިނގަނީ ޑިޖިޓަލް ސްޕޭސްގައި ކަމަށެވެ. އެގޮތުން ސޯޝަލްމީޑިއާގެ އެކި ކްލޯސްޑް ގުރޫޕް ތަކުގައި ހަރުކަށި ފިކުރު ފެތުރުމާއި އެކަމާ ބެހޭ މައުލޫމާތު ފެތެރުމާއި ހަމަލާތައް ރާވާނެ ގޮތްތައް ދަސްކުރަމުންދާކަމަށް ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ އައްޑޫ އޮޕަރޭޝަނުގައި ރާވަމުންދިޔަ ހަމަލާ ހުއްޓުވުމަށް ފުލުހުންގެ އިންޓެލިޖެންސް ކުރި މަސައްކަތާ މެދު ފަހުރުވެރިވާ ކަމަށެވެ.
މި މަހުގެ 11 ވަނަ ދުވަހު މާލެ، އައްޑޫ އަދި ކ. ގުރައިދޫގައި ކުރިއަށްގެންދިޔަ ކައުންޓާ ޓެރަރިޒަމް އޮޕަރޭޝަނުގައި ޖުމްލަ 13 ދިވެހި ފިރިހެނަކު ހައްޔަރުކުރި އެވެ. އޭގެ ތެރޭގައި ހިމެނެނީ އައްޑޫއިން ނުވަ މީހަކު، މާލެއިން ދެ މީހަކު އަދި ގުރައިދޫއިން ދެމީހަކެވެ.
މި އޮޕަރޭޝަނާއި ގުޅިގެން ފުލުހުން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ ހުއްޓުވީ ގިނަ ބަޔަލު މަރާލައިގެން ދޭން އުޅުނު ހަމަލާއެއް ކަމަށާއި އެއީ އިސްލާމިކް ސްޓޭޓް (އައިއެސް)އަށް ތާއީދުކުރާ ބަޔަކު ދޭން އުޅުނު ހަމަލާއެއް ކަމަށެވެ.
ފުލުހުން މައުލޫމާތު ދިން ގޮތުގައި މި އޮޕަރޭޝަން އަންނަނީ އަދިވެސް ކުރިއަށް ގެންދަމުންނެވެ. އަދި ދެވެން އޮތް މިންވަރަކުން މައުލޫމާތު ހިއްސާކުރާނެ ކަމަށްވެސް ފުލުހުން ބުންޏެވެ.
