އައްޑުއާއި މާލެއާއި ކ. ގުރައިދޫގައި ސިފައިންނާއި ފުލުހުން ގުޅިގެން ހިންގި ކައުންޓާ ޓެރަރިޒަމް އޮޕަރޭޝަނުގައި ފެއިލްކޮށްލީ ގިނަ ބަޔަކު މަރައިލަން ދޭން އުޅުުނު ބޮމުގެ ހަމަލާއެއް ކަަމަށް ފުލުހުން ދާދި ދެންމެ ބުނެފި އެވެ.
އިސްކަންދަރު ކޮށީގައި މިހާރު ކުރިއަށްދާ މީޑިއާ ބްރީފިން ގައި އިންސްޕެކްޓަރް އޮފް ޕޮލިސް އުސްވަތު އަހުމަދު ވިދާޅުވީ ހަމަލާ ހުއްޓުވަން ހިންގި އޮޕަރޭޝަނުގައި 14 މީހަކު ހައްޔަރުކޮށްފައިވާ ކަމަށާއި އެއީ އިސްލާމިކް ސްޓޭޓް (އައިއެސް)އަށް ތާއީދުކުރާ ބައެއް ކަމަށެވެ.
"މިފަރާތްތަކުން ރާވަމުން ދިޔައީ ގޮވާތަކެތި ބޭނުންކޮށްގެން ދިވެހިރާއްޖޭގެ ތަންތަނަށް ހަމަލާދީ ގިނަ ބައެއްގެ ފުރާނައަށް ނުރައްކާވާ ފަދަ ހަމަލާއެއް ދިނުމަށް ކަން ފާހަގަކުރެވިފައިވޭ،" އުސްވަތު ވިދާޅުވި އެވެ.
އުސްވަތު ވިދާޅުވި ގޮތުގައި އެމްއެންޑީއެފްއާ ގުޅިގެން އޮޕަރޭޝަން ހިންގާފައިވަނީ އައްޑޫ ސިޓީ އާއި މާލޭގެ އިތުރުން ކ. ގުރައިދޫގަ އެވެ.
ހައްޔަރުކުރި 14 މީހުންގެ ތެރެއިން ނުވަ މީހުންނަކީ މީގެ ކުރިން ވެސް ޓެރަރިޒަމްގެ ތުހުމަތަށް ހައްޔަރުކޮށްފައިވާ މީހުންނެވެ.
އޭނާ އިތުރަށް ވިދާޅުވީ އެ ހަމަލާ ދިނުމަށްޓަކައި ބޭނުންކުރަން ތައްޔާރުކުރަމުން ދިޔަ ބައެއް ތަކެތި ފުލުހުންގެ ބެލުމުގެ ދަށަށް ގެނެވުނު ކަމަށާއި އޭގެ ތެރޭގައި ބޮމުގެ ހަމާލާއެއް ދިނުމުގެ ބައެއް ސާމާނުކަމަށް ބެލެވޭ ތަކެތި ވެސް ހިމެނޭ ކަމަށެވެ.
ނަމަވެސް، އެތަކެތި ތަހުލީލު ކުރެވެމުންދާ ކަމަށް ވިދާޅުވެ އިތުރު ތަފްސީލެއް އޭނާ ނުދެއްވަ އެވެ.
މީގެ އިތުރުން، އެ ހަމަލާދޭން އުޅުނީ ކޮން ތަނަކަށް ނޫނީ ސީދާ ވަކި ބަޔަކަށް އަމާޒުކޮށްގެންތޯ ވެސް މި ވަގުތު ހާމަކުރެވެން ނެތް ކަމަށް އުސްވަތު ވިދާޅުވި އެވެ.
"އެކަމަކު އެ ހަމަލާ ކާމިޔާބުވި ނަމަ، ގިނަ ބައެއްގެ ފުރާނަ ގެއްލިގެން ދިޔުމުގެ ފުރުސަތު ބޮޑު. އެހެންވެ އަޅުގަނޑުމެން މި އޮޕަރޭޝަން ޑިސްރަޕްޓިވް އޮޕަރޭޝަނެއްގެ ގޮތުގަ ކުރިއަށް ގެންދިޔައީ،" އޭނާ ވިދާޅުވި އެވެ.
މިއަހަރުގެ މާޗު 27، ގައި ވެސް ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި، ފުލުހުން ބޮޑު އޮޕަރޭޝަނެއް ހިންގުމަށްފަހު ނުވަ މީހަކު އައްޑޫން ހައްޔަރުކުރި އެވެ. އޭރު އަތޮޅަށް ރައީސުލްޖުމްހޫރިއްޔާ ގެންދެވީ ރަސްމީ ދަތުރުފުޅެއް ކުރައްވަމުންނެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6، 2021، މާލޭގައި ގޮއްވާލި ވަރުގަދަ ބޮމަށްފަހު ވެސް އައްޑޫއިން ފުލުހުން ބަޔަކު ހައްޔަރު ކުރި އެވެ. އެފަހަރު ޖުމްލަ އަށް މީހަކު ހައްޔަރުކުރިއިރު އޭގެ ތެރޭގައި، ނަޝީދަށް ދިން ހަމަލާ މާސްޓާމައިންޑު ކުރި ކަމަށް ބެލެވޭ ހއ. ހޯރަފުށީ، އަލަނާސިގޭ، މުހައްމަދު ތަސްލީމް ހިމެނެ އެވެ.
