ދުނިޔޭގެ އާބާދީ އަންގާރަ ދުވަހުގެ ވަގުތެއްގައި އަށް ބިލިއަނަށް އިތުރުވެފައިވާ ކަމަށް އދ. އިން ލަފާކޮށްފި އެވެ.
"މިއީ އިންސާނުންގެ ތަފާތުކަމާއި ހޯދާފައިވާ ކުރިއެރުން ފާހަގަކޮށް، އިންސާނުން ދުނިޔެއަށް އަދާކުރަން ޖެހޭ ޒިންމާ ހަނދާން ކުރަންވީ ވަގުތެއް،" އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ނެރުއްވި ބަޔާނުގައި ވިދާޅުވި އެވެ.
އދ. އިން ބުނާ ގޮތުގައި ދުނިޔޭގެ އާބާދީ އިތުރުވަމުން ދަނީ އާއްމު ސިއްހަތާއި، ފައިދާ ހުރި ކާނާ އާއި ބޭސް ފަރުވާ އަދި އަމިއްލަ ސާފުތާހިރުކަން ފަދަ ކަންކަމުގައި އިންސާނުން ހޯދަމުންދާ ކުރިއެރުމުގެ ސަބަބުންނެވެ.
އޭގެ އިތުރުން، ގައުމުތަކުގެ ދަރިމައިވުމުގެ ސިއްހަތު ރަނގަޅުވެ، ވަކިން ހާއްސަކޮށް ފަގީރު ގައުމުތަކުގެ ފާޓިލިޓީ ރޭޓް އުފުލުމަކީ އާބާދީ އިތުރުވުމަށް މަގުފަހިވާ ކަމެކެވެ.
އާބާދީ އުފުލޭ ވަރަކަށް ގައުމުތަކަށް ގެންނަ އިގުތިސާދީ ކުރިއެރުމާ އެކު ތިމާވެއްޓަށް ކުރާ އަސަރުތައް ދަނީ ބޮޑުވަމުންނެވެ. ދުނިޔޭގެ އާބާދީ މާ ބޮޑަށް އުފުލެމުންދާ ކަމަށް ބައެއް ފަރާތްތަކުން ދެކެ އެވެ.
އެހެން ނަމަވެސް، މައްސަލައަކީ އާބާދީ އިތުރުވުން ނޫން ކަމަށް ދެކޭ މީހުން ވެސް ގިނަ އެވެ. އެ މީހުން ދެކޭ ގޮތުގައި އިގްތިސާދީ، އިޖުތިމާއީ ހުރިހާ މައްސަލައެއް ދިމާވަނީ ދުނިޔޭގެ ޖުމްލަ އާބާދީގެ ތެރޭގައި ހިމެނޭ މަދު މަހުޖަނުންތަކެއް މުޅި ދުނިޔޭގެ ގުދުރަތީ ވަސީލަތްތައް ނަހަމަ ގޮތުގައި ބޭނުން ކުރަމުން ދާތީ އެވެ.
ނަވާރަ ސަތޭކަ ފަންސާސް ވަނަަ އަހަރު ދުނިޔޭގެ ޖުމްލަ އާބާދީއަކީ 2.5 ބިލިއަނެވެ. އެހެންކަމުން މިހާރު މި ވަނީ ޖުމްލަ އާބާދީ ތިން ގުނައަށް ވުރެ ބޮޑަށް އުފުލިފަ އެވެ.
އދ. އިން ލަފާ ކުރާ ގޮތުގައި 2030 ވަނަ އަހަރާ ހަމައަށް ދިޔުމުގެ ކުރިން އާބާދީ 8.5 ބިލިއަނަށް އަރާނެ އެވެ. އޭގެ އިތުރުން 2050 ގައި 9.7 ބިލިއަން އަދި 2080 ގައި 10.4 ބިލިއަނަށް އާބާދީ އިތުރުވާނެ ކަމަަށް ލަފާކުރެވެ އެވެ.
