ބްރުސެލްސް،، ބެލްޖިއަމް (ނޮވެމްބަރު 15) - ފަސް ދުވަސްތެރޭ ފީފާ ވޯލްޑް ކަޕް ފުޓްބޯޅަ މުބާރާތް ގަތަރުގައި ފަށާއިރު، ބެލްޖިއަމްގެ ކެޕްޓަން، އެޑެން ހަޒާޑް، ހުރީ އެންމެ ހިތްހަމަޖެހިފައެއް ނޫން ކަމަށް ބުނެފި އެވެ.
ބެލްޖިއަމް އިން މިދިޔަ އަހަރުތަކުގައި ބައިނަލްއަގުވާމީ މުބާރާތްތަކުގައި ހޯދި ކާމިޔާބީތަކުގައި ހަޒާޑް، 31، ގެ އިސް ރޯލެއް އެބައޮތެވެ. މި ފަަހަރުގެ ވޯލްޑް ކަޕްގައި ވެސް ބެލްޖިއަމްގެ ކޯޗު، ރޮބާޓޯ މާޓީނޭޒް، ޓީމުގެ ކަންކަމަށް ތަފާތެއް ގެންނަން ރާވާނީ ހަޒާޑް ހިމަނައިގެންނެވެ.
އެކަމަކު، މި ފަހަރު ގަތަރުގައި ކުރިއަށްދާ ފީފާ ވޯލްޑް ކަޕްގެ ކުރިން ދިން އިންޓަވިއުއެއްގައި ހަޒާޑް ވަނީ އޭނާ އަށް ކްލަބް ލެވަލްގައި އެކަށީގެންވާ މިންވަރަށް ކުޅެވިފައިނުވާތީ، "ހުރިހާ ކަމެއް ރަނގަޅު ކަމަށް" ނުބުނެވޭނެ ކަމަށެވެ.
ހަޒާޑް މި ސީޒަނުގެ މިހާތަނަށް ކުޅެފައިވަނީ ރެއާލްގެ ހަ މެޗެއްގަ އެވެ. އެއް ގޯލު ޖެހިއިރު، އެއް ގޯލު ޖަހަން ފުރުސަތު ތަނަވަސްކޮށްދިނެވެ.
"ސުވާލަކީ އަހަރެން (ރެއާލްގައި) އެހާ މަދުން ކުޅެނީ ކީއްވެތޯ؟ މި ސީޒަން ފެށުމުގެ ކުރިން އަހަރެން އަންޗެލޮޓީ (ރެއާލްގެ ކޯޗު)އާ އެކު މަޝްވަރާތަކެއް ކުރިން. އަހަންނަށް ގިނަ މެޗުތަކެއް ލިބޭނެ ކަމަށް ބުނި، އެކަމަކު، އެހެނެއް ނުވި، އަހަންނަށް އެ ސަބަބުތަކެއް ސާފެއް ނޫން،" ހަޒާޑް ބުންޏެވެ.
ބެލްޖިއަމުން 2018 ވަނަ އަހަރު ފީފާ ވޯލްޑް ކަޕްގެ ތިން ވަނަ ހޯދި ޓީމުގައި މޮޅަށް ކުޅުނު ހަޒާޑް ބުނީ މެޗުތައް ކުޅޭ ވަރަކަށް އޭނާގެ 100 ޕަސެންޓް ފެންނަން ފަށާނެ ކަމަށެެވެ. ރެއާލްގައި މެޗު ކުޅެން ނުލިބި އޮތް އޮތުން، ވޯލްޑް ކަޕަށް ފަހު ބަދަލުވާނެ ކަމަށް ހަޒާޑް އުންމީދުކުރެ އެވެ.
"އަހަރެން ރެއާލް ދޫކޮށްލަން ބޭނުމެއް ނޫން. ފަހަރުގައި ވޯލްޑް ކަޕަަށް ފަހު ކަންތައްތައް ބަދަލުވާގޮތް ތަފާތުވެދާނެ. އަހަރެން ކުޅެން ބޭނުން، އެކަމަކު، އެ ނިންމުން އޮންނާނީ ހުންނަ ކޯޗެއްގެ އަތްމަތީގައި،" ހަޒާޑް ބުންޏެވެ.
ޖެނުއަރީ ޓްރާންސްފާ މާކެޓްގައި ހަޒާޑްގެ ސޮއި ހޯދަން އިންގްލެންޑާއި އިޓަލީގެ ޓީމުތަކުން މަސައްކަތް ކުރާނެ ކަމަށް ރިޕޯޓްތައް ބުނެ އެވެ.
ބެލްޖިއަމް ގައުމީ ޓީމަށް 2008 ވަނަ އަހަރުން ފެށިގެން ކުޅެމުން އަންނަ ހަޒާޑް ވަނީ މިހާތަނަށް އެ ޓީމަށް 122 މެޗު ކުޅެދީފަ އެވެ. އެ މެޗުތަކުގައި ޖުމްލަ 33 ލަނޑު ޖެހި އެވެ.
މި ފަހަރުގެ ވޯލްޑް ކަޕްގައި ބެލްޖިއަމް ހިމެނެނީ ކެނަޑާ، ކްރޮއޭޝިއާ އަދި މޮރޮކޯއާ އެކު ގްރޫޕް އެފްގަ އެވެ. ބެލްޖިއަމް ފުރަތަމަ މެޗުގައި ނުކުންނާނީ މި މަހު 23 ވަނަ ދުވަހު ކެނަޑާއާ ދެކޮޅަށެވެ.
