މިސްރުގެ ޖަލެއްގައި ބަންދުކޮށްފައި ހުރި އެކްޓިވިސްޓް އަލާ އަބްދެލް ފައްތާހް ދިރިހުރިކަމުގެ ހެކި ކަމާ ބެހޭ އިދާރާތަކުން އާއިލާއަށް ދައްކައިފި އެވެ.
ނުހައްގުން ބަންދުކޮށްފައި ހުރުމުން އަލާ ބަނޑުހައި ހޫނުކަމުގެ ހަޅުތާލު ކުރާތާ ހަތް މަސް ވެއްޖެ އެވެ. މިދިޔަ ހަފުތާގެ އާދީއްތަ ދުވަހު އޭނާ ފެން ބުއިން ވެސް ހުއްޓާލި އެވެ.
އަލާގެ އާއިލާއިން ބުނީ އެ ދުވަހުން ފެށިގެން އޭނާގެ އެއްވެސް ހަބަރެއް ނުވާ ކަމަށެވެ. އަލާއަކީ މިސްރާއި އިނގިރޭސިވިލާތަށް ނިސްބަތްވާ މީހެކެވެ.
މީގެ ދެ ދުވަސް ކުރިން އަލާގެ ފަރާތުން އޭނާގެ މަންމައަށް ފޮނުވި ސިޓީއެއްގައި ބުނީ އަލުން ފެން ބޯން ފަށާފައިވާ ކަމަށާއި ސިއްހީ އެހީތެރިކަން ލިބެމުންދާ ކަމަށެވެ.
އުމުރުން 40 އަހަރުގެ އަލާ މަގްބޫލުވީ 2011 ވަނަ އަހަރު މިސްރުގެ ކުރީގެ ރައީސް ހުސްނީ މުބާރަކްއާ ދެކޮޅަށް ހިންގި ބޮޑު އިންގިލާބުގެ ތެރެއިންނެވެ.
އޭގެ ފަހުން މިސްރުގައި އޮތީ ޑިމޮކްރެޓިކް އުސޫލުތަކާ އެއް ގޮތަށް އިންތިހާބު ކުރި ސަރުކާރެކެވެ. އެކަމަކު 2014 ވަނަ އަހަރު އަސްކަރީ ބަގާވާތެއްކޮށް، ސިސީ ވެރިކަމަށް ވަޑައިގެންނެވި އެވެ.
ސިސީ ވެރިކަމަށް ވަޑައިގެންނެވި ފަހު އަލާ ގިނަ ވަގުތު ހުރީ ޖަލުގައި ނުވަތަ ފުލުހުންގެ ބަންދުގަ އެވެ. މިދިޔަ އަހަރު އޭނާގެ މައްޗަށް ސާބިތުވީ ދޮގު ހަބަރު ފެތުރި ކަމަށެވެ. އަދި ފަސް އަހަރުގެ ޖަލު ހުކުމެއް އިއްވި އެވެ.
