ފިއުލް ސަޕްލައި މޯލްޑިވްސްގެ ޝެޑުތަކަށް އުރީދޫ މޯލްޑިވްސްގެ ޑިޖިޓަލް ވޮލެޓު، "އެމްފައިސާ" އިން ފައިސާ ދެއްކޭނެ އިންތިޒާމް ހަމަޖައްސައިފި، ސައިކަލެއް ލިބޭ ޕްރޮމޯޝަނެއް ފަށައިފި އެވެ.
މިކަން ތައާރަފުކުރަން މިއަދު ހެނދުނު ކާނިވާ ކުރިމަތީގައި ހުންނަ ޝެޑު ސަރަހައްދުގައި ބޭއްވި ހަފުލާގައި އުރީދޫގެ މެނޭޖިން ޑިރެކްޓަރު އަދި ސީއީއޯ ހާލިދު އަލް ހަމަދީ ވިދާޅުވީ މީގެ ކުރިން ވޮލެޓު ބާއްވާފައި ގެއިން ބޭރަށް ނުކުމެވުމަކީ ވަރަށް ބޮޑު ހާސް ކަމެއް ލިބޭ ކަމެއް ކަމަށާއި، ނަމަވެސް މިފަދަ ބަދަލުތަކާ އެކު ހުރިހާ ކަމެއް ވެސް ފޯނުން ކޮށްލެވޭ ކަމަށެވެ.
އޭނާ ވިދާޅުވީ އުރީދޫން މަސައްކަތް ކުރަނީ އަބަދުވެސް ކަސްޓަމަރުންނަށް ލުއިފަސޭހަކަން ހޯދައިދިނުމަށް ކަމަށާއި ޕެޓްރޯލް ޝެޑުތަކުން އެމްފައިސާ ބަލައިގަންނަ ފެށުމަކީ ލިބުނު އުފަލެއް ކަމަށެވެ.
އެފްއެސްއެމްގެ ޝެޑުތަކަށް އެމްފައިސާއިން ފައިސާ ދެއްކޭ ގޮތް ހެދުން ތައާރަފުކުރަން ބޭއްވި ހަފުލާގައި އެފްއެސްއެމްގެ މެނޭޖިން ޑިރެކްޓަރު ގަސަމް ވާހަކަ ދައްކަވަނީ. -- ފޮޓޯ: މިރާޝް/އަދަދު
މި އިންތިޒާމާއެކު މިއަދު ވަނީ ހާއްސަ ޕްރޮމޯޝަނެއް ވެސް ފަށައިފަ އެވެ. ހަ މަސް ދުވަހަށް ހިންގާ މި ޕްރޮމޯޝަންގައި އެމްފައިސާއިން ޕެޓްރޯލަށް ފައިސާ ދައްކާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް ކިންގްސްޓަން މޯލްޑިވްސްއިން ސްކޫޕީ ސައިކަލެއް ލިބޭނެ އެވެ.
އުރީދޫގެ އެމްފައިސާ މެދުވެރިކޮށް މިހާރު ވެސް ވަރަށް ގިނަ ފިހާރަތަކާއި، ރެސްޓޯރެންޓު އަދި ކެފޭތަކަށް ފައިސާ ދެއްކެ އެވެ. ޒަމާނަށް އައި ބަދަލާ އެކު ހުރިހާ ކަމެއް ޑިޖިޓަލް ވަމުން ދާއިރު، ޕެޓްރޯލު ޝެޑުތަކަށް އެމްފައިސާއިން ބިލް ދެއްކުމުގެ އިންތިޒާމް ހަމަޖެހިގެން ދިއުމަކީ ކަސްޓަމަރުންނަށް ލުއި ފަސޭހަތަކެއް ލިބޭނެ ކަމެއް ކަމަށް އެފްއެސްއެމްއިން ބުނެ އެވެ.
