ލ. މާންދޫ މަސް ފެކްޓަރީއިން މަސް ކިރުމަށް ފަހު، މަސްވެރިންނަށް ލިބެން ޖެހޭ ފައިސާ ނުލިބި ލަސްވާތީ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެވެ.
ގަމު ދާއިރާގެ މެންބަރު މުހައްމަދު ވިސާމް ހުށަހެޅުއްވި ކުއްލި މައްސަލައިގައިވަނީ ހޮރައިޒަނުން ހިންގަމުން އަންނަ މާންދޫ މަސް ފެކްޓަރީއަކީ ތ. އަތޮޅާއި ލ. އަތޮޅުގެ މަސްވެރިންނަށް ނުހަނު ބޭނުންތެރި ތަނަކަށް ވީއިރު، މިހާތަނަށް އައިރު ވެސް މަސްވެރިންގެ ޝަކުވާތަކަށް އެއްވެސް ހައްލެއް ހޯދުމަށް މަސައްކަތްކޮށްފައި ނުވާ ކަން ފާހަގަކޮށްފަ އެވެ.
މަސްވެރިންގެ އަތުން އެ ފެކްޓަރީން ގަންނަ މަސްތަކުގެ އަގު ތިން ހަފުތާގެ ތެރޭގައި ދެއްކުމަށް އެއްބަސްވެފައި އޮވެ އެވެ. އެހެންނަމަވެސް މި މުއްދަތުގައި ފައިސާ ލިބިފައިނުވާތީ މަސްވެރިން އަންނަނީ މާންދޫގައި މުޒާހަރާ ކުރަމުންނެވެ.
ކުއްލި މައްސަލައިގައި ވަނީ 26 ދޯންޏަކުން ކިރާފައިވާ މަހަށް 21 މިލިއަނަށް ވުރެ ގިނަ ރުފިޔާ ނުލިބިވާ ކަން ފާހަގަކޮށްފަ އެވެ.
މަސްވެރިންނަށް ދިމާވެފައިވާ މި ހާލަތުން އަރައިގަތުމަށް، މަސްވެރިންގެ ހައްގުތައް ހޯދައިދިނުމަށް ކަމާގުޅޭ އިދާރާތަކާ ގުޅިގެން މަސައްކަތް ކުރުމަށް މި މައްސަލައިގައި ގޮވާލާފައިވެ އެވެ.
މި މައްސަލަ މަޖިލީހަށް ބަލައިގަތުމާމެދު ނެގި ވޯޓުގައި ބަލައިގަންނަ ކަމަށް ފާސްވެފައިވަނީ ވޯޓުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.
ކުއްލި މައްސަލައަށް ވާހަކަދައްވަކަވަމުން ވިސާމް ވިދާޅުވި ގޮތުގައި މާންދޫއިން މަސް ގަންނަމުން އަންނަނީ މިފްކޯއާ އެއް އަގެއްގައެއް ނޫނެވެ. އަދި މަސްވެރިންނަށް ތެޔޮ ލިބުމުގައި ވެސް ދަތިތަކެއް އެބަހުރި އެވެ.
"ދެކުނުގެ މަސްވެރިންނަށް ވެސް ހަމަ ލިބޭ އަގުގައި ޖެހޭނެ ލާމުގެ މަސްވެރިންނަށް ވެސް މަސް ކިރެން، މި ސަބަބުތަކާ ހުރެ ހަގީގަތުގައި މި ކުއްލި މައްސަލަ މި ހުށަހެޅީ،" ވިސާމް ވިދާޅުވި އެވެ.
މި މައްސަލައިގައި ފޮނަދޫ ދާއިރާގެ މެންބަރު މޫސާ ސިރާޖު ވެސް އިއްޔެ ވަނީ މަޖިލީހުގެ ރައީސަށް ސިޓީއެއް ފޮނުއްވާފަ އެވެ.
އެ ސިޓގައި ބުނީ ލ. މާންދޫގައި ގާއިމްކޮށްފައިވާ ހޮރައިޒަން ފިޝަރީޒް ޕްރައިވެޓް ލިމިޓެޑުން މަސްވެރިން ބާނާ މަސް ކިރައި، އެމަހުގެ ފައިދާ ދޫނުކޮށް އެތަކެއް ދުވަހެއް ވެފައިވާ ކަމަށާއި، އެ ފައިސާގެ އަދަދު މިހާރު މިލިއަން ރުފިޔާއަށް އުފުލިފައިވާ ކަމަށެވެ. އަދި އެކަމުގެ ސަބަބުން މަސްވެރިންނާއި، މަސްވެރިންގެ އާއިލާތަކަށް ބޮޑެތި ދަތިތަކާ ކުރިމަތިވެފައިވާ ކަމަށް އެ ސިޓީގައި ވެއެވެ.
